Ka District Magistrate ka East Khasi Hills da pynmih hukum ko ynne ka sngi wow pyndam ya ka Curfew da 12 kynta ha sor Shillong wa ki thaw wa em cha khap sor ha ka 19 tarik Naisaphra, 2021.
Ka Curfew daw pyndam nadooh 5:00 waje i step hadooh 5:00 waje i janmiet ka 19 tarik wei daw sdang biang ko nadooh 5:00 waje i janmiet ka 19 tarik hi hadooh 5:00 waje i step ka 20 tarik u Naisaphra.
Ha kini ki por wa pyndam ya ka Curfew, da chah wow wai ki dukan wa dai marbaam hadooh 4:00 waje i janmiet.
Ki yung krehkaam sorkar, ki Bank, ki Post Office, ki yung krehkaam ki thaw puræ kamjooh ki yong ki bru samen u wai ki deiwa em 30% ki bru wakreh wei u khang ki 4:00 waje i janmiet thij. Ya ki Bank won waroh ki kaam yong ki bru toh u pyndep hapoh 3:00 waje yow ye ki u khang chwa ka 4:00 waje.
Ym pu chah wow pynman ya kiwon kiwon ki yalang paidbah, i lai uiñ hapoh ka District kamjooh cha kiwi ki District lait na kiwa yoh Pass. Ki kari kamai u lai ki katkam ka hukum kawa pynmih ha ka 17 tarik uni u bnai.
Heipor wa krehkaam biang ka Curfew ym chah yei lai i wan ki bru kamjooh ki kari. Ki dukan, ki yung krehkaam wa ki skur toh u man ki kiwa khang. Ym chah leh wow pynman ya kiwon kiwon ki yalang paidbah.
Ki kaam wa chah heipor wa em ka Curfew toh du ki kaam wa yatoh wa i chait i khiah, ki kaam wa yatoh wa u COVID-19, ki wakreh ka DIPR, ka Municipal, MeECL, ki laad pathai khubor wa ki Pharmacy.
