Ka Diza’s Socio & Sports Club kam kawa pait wa pynlai yaka yakob Miss Jowai 2023-2024 kawa daw man ha u bnai December, ynne ka sngi da pynman ko yaka Final Audition ha Little Angels Secondary School Jowai neibynta u jied khaddooh yaki khyllood kiwa yoo biang u mih haka rynsan yakob Miss Jowai.
Ha kani ka Final Audition da em 12 ngut ki khyllood kiwa na Ri-loom Jaiñtia kiwa da wan chakhmat naki chong waphær waphær wa kynthup leh na Jowai, wei najrong wa bichaar yei rukom lai kini ki khyllood da em haroh ka bynta kylli yukylli na kiwa bichaar.
Chwa kani ka Final Audition da em 21 ngut kiwa da wan cha ki 3 tylli ki Audition kiwa da pynman chwa kani ka Final Audition.
Haka yalang tbian chwa u sdang ka Audition, neiliang ka President ka Diza’s Socio & Sports Club, ka E.E. Laloo ong ko kani ka Miss Jowai man ko chibynta i lehkmen yei miat, i chemphang wei wow pynkupbor yaki kynthai ka Ri-loom Jaiñtia yow ye ki wow lai chakhmat hei im wa miat wa bha.
Wei lyngba kani ka rynsan u yoh laad ki wow pynyoo yei man kyrpang yong ki, i man chlur wa kiwi de ki rukom wa man i myntoi yaka jaitbru ka imlang sahlang.
U Dr. H.H. Mohrmen, Social Activist kam u kongsan hawa riñ dur u wow pachat yei yumut yong kani ka rynsan yakob miat kynthai, da e nongmuna u wa ha ki por nachwa yaka kynthai da pait du yei miat dur donhi wei da kheiñ leh yaka du neibynta wow chongkha chongman, tangwa hei yong sakhiat wot ka kynthai leh ye hi ko u leh boon jait ki kaam haka imlang sahlang.
Kamtæ yooluti u wa lyngba i chah sikai i embynta kini ki khyllood ha kani ka rynsan la jop næ rem leh daw yoh myntoi bha ki heiyatoh wa ka luti i im chaphrang.
Neiliang kiwa mihkhmat napoh ka Butterfly Accessories and Clothing kiwa da embynta lang ha kani ka yakob pyntip haroh ki wa heiyatoh waka Mega Miss Northeast manda khut Audition, kitu kiwa sñiaw chkeh sñiaw biang haki liang waphær waphær ye ki wow lai Audition, tangwa ya kawa rah naam jop Miss Jowai won da man kawa yoh psiah chwa hapoh ka rynsan yakob Mega Miss Northeast.
Kiwi won wa klam kynthup ya u Dr. Elvee Marbaniang, Secretary Diza’s Socio & Sports Club, u Aris J Nongkynrih, A&G Enterprise, Event Partner wa kiwi.
Heiyatoh wa kiwa chah jied napyrdi kini ki 12 ngut daw pynbna hadien.
Discussion about this post