Ka Sports & Youth Affairs da pynbna ko wow sdang noh ya ka Super Elite Program (SEP) yow pynpliah ya 12 ngut kiwa yalehke kiwa em yei sap kiwa daw chah sikai ha ki International Coach deiwa booh ya ka thong yow ye ki u yakhun ha ki yakob wa em hapoh ka ri wa cha kiwi ki ri.
Kani ka SEP u em ko hapoh ka STAR Program katkam wa da pynbna da ka sorkar Meghalaya kam chibynta iwa da mang u Montri Rangbah wow pynmih ya kiwa yalehke Olympics kat ha u 2032 deiwa chna leh ki thaw yalehke wa thymme wa kiwi de ki kaam wa da pynkreh, kamtæ da yooluti wow ye u pynmankaam ya ini.
Kini ki 12 ngut da jied hadien wa da pynman ya kiwa boon ki jait kaam nadooh wow thooh ya kiwa em yei sap, i jied ya kiwa ye u lai chakhmat iwa da chimpor chi snem iwa da leh da ka Meghalaya State Olympic Association hapoh i pait ka Edge10 kawa man ka Company na Australia wa yahkhmat da u Ian Campbell uwa jooh yalehke Olympics.
Deiwa dep u bichaar yei bor i sap yong palat 14,500 ngut kiwa yalehke ka Meghalaya iwa da yabhah ha ki ar bynta deiwa pynemkaam yei stat wa katkam ka juk wa katni wa pynemkaam da ka Edge10. Hapoh ka Phase-1 da em 4,500 ngut kiwa da chah jied ha ka Elite Pathway Program, iwa man leh i e sikai wa chi snem kiwa kynthup nadooh ki sikai lyngba ka App wa ki Training Camp wa pynman da u Ian Campbell, wei na kini da jied 9 ngut kiwa yalehke (6 ngut ha ki Athletics, 2 ngut ha Weightlifting wa uwi ha ka yalehke Karate) katwa kiwi won u pteiñ ki hapoh ka Elite Pathway Program.
Neibynta kiwi won ki 10,000 ngut kiwa yalehke hapoh ka Phase-2, daw chah jied kamwa leh ha ka Phase-1, wei na kini daw jied 3 ngut kiwa daw yoh u chimbynta ka Super Elite Program, iwa mut waroh daw em 12 ngut deilang wa ki 9 ngut naka Phase-1.
Kini kiwa chah jied toh ki chynrang wa ki kynthai kiwa na kylleiñ ka jylla wei daw pait ya ka da ka MSOA deilang waka chnat nadooh i lai skur ki, i baam, i thaw sah wei yei sikai daw pait da u Ian Campbell neibynta 3 snem deiwa yarap da jar jiar ki Coach kiwa yatoh wa ki jait yalehke wa jied ki wei ya kini daw pynsah ya ki ha Shillong yow chimbynta ki leh ha kiwa boon ki yakob chwa wow ye ki u chimbynta ha ki yalehke kiwa cha baar ri.
