Shillong: Hadien wa i e por yong kiwa sikai SSA wa ki 4th Teachers ya ka sorkar jylla wow pynmankaam yei dawa yong ki da kut i ha ka 31 u Wisu wei ka sorkar da suki ko kiaw kiaw kow kow, ka synjuk yong kiwa sikai SSA wa 4th Teachers hapoh la jylla, ka Meghalaya SSA School Association (MSSASA) Central Body da pynbna ki da ka yakhih da kawa lai paidbah (Public Rally) ha Shillong ha ka 12 tarik uni u bnai ka wow sdang nadooh ka por 10 waje i step ka wow lai luti nadooh na Fire Brigade, St.Edmund’s College, Dhankheti, Malki, Barik, IGP wei daw pynkut ha Additional Secretariat.
Ha kani ka lai paidbah daw yah lang leh wa ki khon ki kti kiwa sikai wei da kyntu ya ki wow wan ki thij næ heipor 9 waje i step ha madan Jingkieng Nongthymme.
“I da yaichah i waroh chi kattu, deiwa yooluti wa ka Sorkar MUA – II wa yahkhmat da ka Congress u chim khia ko ya i eh i khoo kiwa sikai SSA wa 4th Teachers da yachem ki neipor cheipor khamtam hei yatoh wa ka tulop thymme wa ki Arrears yong ki 12,481 ngut ki wa sikai SSA kawa da toh u yoh ki nadooh u Naitung (April) 2016 katkam i pynmih hukum da u Commissioner & Secretary ka tnat puræ puthi ka jylla uwa man leh u State Mission Director ka SEMAM ha ka 31 tarik Naichiphaw, 2016 kawa hadooh katni ka Sorkar ympu pyllait ko” ong u Aristotle C. Rymbai President ka MSSASA seiñbei.
Ha man la ki Assembly Session, ka sorkar ka klam ko chaphang i pynku pynjanai yei nang i stat (Quality Education) wei wow pynbniah ya kiwa sikai, tangwa ka sorkar won ym jooh leh ko iyi iyi hei yatoh wa ini. Lada ka sorkar em sakhiat ko i kitkhlieh hajrong ini i leh won hei yatoh wa ka result ka Diploma in Elementary Education (D.El.Ed) kawa soi soskular ka sorkar wa ka NIOS heiwa 7822 ngut kiwa sikai ha ka kyrdan Elementary School da chah ktah nei leh thurmur yong ka NIOS wei mynnu won u phah Training ko sa ya kiwa sah yow pyndep ki ya ka Professional Qualification (D.El.Ed) næ u yang ko hadooh wa ka Sorkar Pyrdi u pynmih hukum noh ko wow pyndooh kreh ya ki da ong chooh chooh u A.C.Rymbai.
Discussion about this post