U Lat ka jylla Meghalaya u Satya Pal Malik ynne ka sngi da pynman u yaka yalang wa u Montri Rangbah ka jylla u Conrad K Sangma wa u Montri ka chnat i chait i khiah u AL Hek yow ya phyllu yei long i man ka khlam COVID-19 hapoh ka jylla.
Da emlang leh u Dr. Aman War, DHS (MI) wa u Ram Kumar, Mission Director NHM uwa da pynyoo yei long i man ka khlam. Neiliang u Montri Rangbah da batai u ya u Lat yei yei pynkhreh ka jylla wow yaleh pyrchah ya ka khlam heiwa da pynboon ya ki pyllong neibynta kiwa yoh COVID-19 hapoh ka jylla, ki pyllong hapoh ki ICU wa i e la-ær Oxygen. Da batai bniah u leh yei buit ka sorkar wow kdoh u khoom yei poor ka khlam.
Da pyntip u leh wa kamwa man kattæ da em 1456 ngut kiwa dang chah ktah ha ka khlam wei kiwa yoh ya uni u khñiang da ku ko hawa nujor wa ki 3 bnai nachwa, heiwa da pynmih leh ya ki kyndon wa thymme heiyatoh wow leh Quarantine wa i leh ya yei chong kset ha yung. Da pyntip leh wa kamwa 1200 ngut na ki 1456 ngut toh kiwa em hapoh 45 snem wei du deiwa e dawai tika u ye wow kdoh u khoom ya kani ka khlam. Chooh da pyntip leh wa dap hi i em dawai tika hapoh ka jylla wei da booh bhah leh 65 tylli ki thaw thiah ha ki ICU wa 700 tylli ki thaw thiah kiwa em Oxygen yow pynemkaam heipor wa jhan.
U Montri Rangbah da pyntip u leh wa ka sorkar jylla ym em kheiñstiñ ko nadooh wa sdang uni u snem wei da pynjoor yei leh Test wa i e dawai tika.
U Lat da pynsñiaw u yei sñiawhun yeiwa da pynkhreh ka jylla deiwa kyntu leh wow pynchlur ya ki bru wow wan chim ki yei dawai tika deiwa pynman leh ya ki pynsñiawthooh paidbah. Da e buit u leh wa ya kitu kiwa yoh ya uni u khñiang kiwa ym em ki dak ki chin wa chitom wow chong kset ki ha yung yow pynstiñ ya ki Hospital, deiwa e yarap leh ya kitu kiwa chong ha yung yow pait ki pyn ya idæ wei wow wan pait ki Doctor ya ki ha yung. Da pdiang ya ini i tyrwa da waroh wa em ha ka yalang.
