Kiwa dang yoh COVID-19 ha Meghalaya ynne ka 9 tarik hadooh i por 1 waje i sngi da em ki 121 ngut, 107 ngut kiwa chait wa 2 ngut kiwa yap katkam wa pyntip u DHS(MI) ka jylla u Dr. Aman War.
Na kiwa dang yoh thymme ha East Khai Hills da em 30 ngut (chipai-2, paidbah-28), Ri Bhoi 2 (chipai-1, paidbah-1), South Garo Hills-4, West Garo Hills 25 (chipai-11, paidbah-14), West Khasi Hills-1, East Jaiñtia Hills-59.
Kiwa dang chait toh ha East Khasi Hills-88, South West Garo Hills-2, Ri Bhoi-2, East Garo-2, East Jaiñtia Hills-4, West Garo Hills-5, North Garo-4.
Ki 2 ngut kiwa dang yap toh kiwa na East Khasi Hills, kawi toh kawa tip kam ka Usha Paul (58 snem) kawa na Laban wei toh kawa da em chwa hapoh Hospital, kawa em leh yaka High Blood Pressure nalor u COVID-19 wei da khlaad noh ko haka 8 tarik heipor 7:40 i miet ha Nazareth Hospital. Sa uwi uwa khlaad toh u Debu Chettri (78 snem) uwa na Abas Compound Qualapatty Garikhana wei da li booh cha Nazareth Hospital haka 8 tarik wei da khlaad u ynne i step ka 9 tarik heiwa uni leh toh u em yaka High Blood Pressure wa i kjut chini.
Ki bru paidbah kiwa dang yoh thymme ha East Khasi Hills toh ki 20 ngut ki High Risk Contanct, 3 ngut deiwa Test paidbah ha Keating Road, 4 ngut kiwa chitom ILI, 1 na i Test paidbah ha Police Bazaar. Ha Ri Bhoi 1 High Risk Contact. Ha South Garo Hills 4 ngut na ki Test paidbah ha Baghmara. Ha West Garo Hills 1 wa liwan wa 2 ngut na i Test paidbah ha Rongram, 3 ngut ki High Risk wa kiwa sah toh na ki Test paidbah ha kiwi ki thaw. Ha West Khasi Hills 1 High Risk Contact. Ha East Jaiñtia Hills 59 ngut kiwa chem deiwa Test paidbah ha Star Cement, Lumshnong. Katkam wa pyntip u DHS, da ong wa ha Star Cement da jia neidaw wa boon i psiah i mih ki Truck wei lada kamni daw hap phah khang chwa ya katai ka karkhana.
Kiwa dang em COVID-19 ha ki District man ki kamni ha wah:
East Khasi Hills: 860 (chipai-152, paidbah-708)
West Khasi Hills: 31
South West Khasi Hills: 1
Ri Bhoi: 117 (chipai-31, paidbah-86)
West Jaiñtia Hills: 11
East Jaiñtia Hills: 85
West Garo Hilla: 193 (chipai- 97, paidbah-96)
South West Garo Hills: 5
South Garo Hills: 20 ki chipai
East Garo Hills: 23
Noth Garo Hills: 9
Waroh kiwa dang em ya uni u khñiang da em ki 1355 ngut, kiwa chait 1823 ngut wa 19 ngut kiwa yap.
