132 ngut kiwa yap, da ki spah ngut wa mynsoo hei khih khmi wa joor ha Nepal

U khmi wa khlanbor 6.4 ha ka Richter Scale da khih u heipor 11:32 (IST) hei miet ka 3 tarik wei ya uni u khmi da sñiaw leh chadooh cha New Delhi.

Uni u khmi wa joor bha toh uwa da khih ha ki thaaiñ Jajarkot District ka Nepal kawa em cheiliang sepsngi kani ka ri heiwa da haap da oor ki yung wei kiwa yap katkam wa pyntip ki pulit toh 132 ngut.

I sien wa khaddooh wa khih u khmi wa joor ha Nepal toh ha u snem 2015 heiwa da em kamwa 9,000 ngut kiwa yap heiwa da dooh leh ya kiwa boon kiwa da chna da tei da u warim hapoh kani ka ri iwa da wanrah yei dooh nong wa $6 Billion.

Ini i thaw wa khih khmi kattæ toh iwa jngai kamwa 500 Km na Kathmandu heiwa heini da sñiaw leh ya u khmi tangwa ymtoh da uwa joor.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ha ki thaw wa joor khih u khmi toh iwa em boon ki chnong wa khian ha ki thaw wa man loom kiwa jngai iwi na iwi wei da em kamwa 1,90,000 ngut kiwa sah ha kini ki chnong.

Heiyatoh wa kiwa mynsoo da antaad wa ye ki wow em da ki spah ngut wei ya kiwa yap kiwa boon wa chem toh hapoh ka Jajarkot District kiwa 96 ngut wa 36 ngut naka Rukum West District wei ka chnong wa pyrdi wa sdang uni u khmi toh iwa tip kam ka Ramidanda.

85 ngut kiwa mynsoo toh kiwa da chem na Rukum West wa 55 ngut on na Jajarkot wei da ye wow pynpoi 50 ngut cha ki Hospital wa em ha Jajarkot.

Kiwa boon ki yung da oor ki wei da kaad ki heiwa kiwa chong chnong da sah miet ki cha lait hapyri i kjam neidaw wa tieñ ya wan biang u khmi.

Yow ye u poi cha kini ki thaw, daw hap wow pynhooid ya iwa boon ki oor khyndaw, oor moo iwa da pynslem leh wow pynpoi yei yarap.