Nadooh wa sdang u slap wa joor ha ka 26 tarik hadooh ynne i step nei wan ka Cyclone Remal, ki yung ki sem wa chah ktah wa em ha Meghalaya da em ki 29 tylli katwa ki bru wa chah da em ki 134 ngut heiwa da yap uwi wei waroh ki chnong wa chah ktah da em 17 tylli.
Kini ki chong toh kiwa em kawi ha East Garo Hills heiwa kiwa chah ktah da em ki 6 ngut katwa ki yung wa chah ktah da em ar tylli kiwa da chah thlieh pyrthat ha chnong Rongrong Bolsongchok wa dang haap hapoh ka Songsak C&RD Block iwa da jia ha ka 26 tarik.
Ha North Garo Hills da em 7 tylli ki chnong wa chah ktah wei ki bru wa chah ktah da em ki 125 ngut, ki yung won 22 tylli wa iwi i skur.
Ha Eastern West Khasi Hills da em kawi ka chnong wa chah ktah, iwi i yung wa chah ktah wa 3 ngut ki bru wa chah ktah.
Ha South West Khasi Hills da em iwi i chnong wa chah ktah deilang wa iwi i yung.
Ha East Khasi Hills da em i oor khyndaw ha Kench’s Trace hajan Rilbong Beat House, ha Mawlai Bypass wa ha u sarok wa lai cha Tyrsad wa dang haap ha Mawphlang Block wa ha Lower Lumparing iwa da jia ynne ka sngi.
Ha Sutnga Weiloi, iwa dang haap hapoh ka Wapung C&RD Block, East Jaiñtia Hills da haap iwi i chram yung neidaw wa oor khyndaw heiwa da khlaad uwi iwa da jia ynne ka sngi.
Ha South West Khasi Hills da chah ktah toh 4 tylli ki chnong wei da em i oor khyndaw ha 13th KM MR Road iwa da jia ynne wei da em leh u chrot bordiñ wa haap ha chnong Khonjoy ynne hi.
Ha kiwi ki District kitæ ka West Garo Hills, South Garo Hills, South West Garo Hills wa ha West Jaiñtia Hills dang yang khubor.
Neiliang ka sorkar da phah ko ya ki bru yong ka na ki chnat wa boon yow lai e yarap ya kiwa chah ktah.
Discussion about this post