Shillong: Ka Langsning Greenergy Lions la le tayaw kattu da jop ko ha waroh ki yalehke yong ka wei ynne ka sngi da pynrem ko ya ka Unified Gorkha Gators ha waroh ki 5 tylli ki yalehke yong ka ha ki Group Stage haka Meghalaya Baby League (MBL) 2018.
Ha ka sngi wa che wa rang ki khynnah na ki 8 tylli ki dhab da yaleh ke chong chit ki ha ki 20 tylli ki yaleh ke wa pynman ha Jawaharlal Nehru Sports Complex.
Ynne ka sngi waroh da thap hadooh 140 tylli ki kool heiwa ka Greenergy Lions da thap ko 37 tylli ki kool khlem chah thap chi kool.
Haka Western Conference won wa pynman hapyrdi ka Little Star Clouded Leopards waka Kickstart FCC Rhinos, ka Rhinos da jop ko le seiñ katwa ka Leopards da jop ko chisien katwa da ya drawn chisien.
Hake Eastern Conference won, ka Touchline NE Cubs won da jop ko ya ki le tylli ki yalehke yong ki pyrchah ya ka Nongthymmai GC Scorpions, katwa ka Nongthymmai won da jop ko ya ar tylli, ka Sunnydale School Doves da ye ko wow jop arsien pyrchah ya ka JNS Jaguars katwa ka Jaguars won da jop ko chisien wei da ya drawn ko arsien.
Kamwa da yoo hi nadooh wa sdang ka MBL ki khynnah kiwa hapoh 5 snem toh kiwa muja wa chong chit dooh wow yalehke kiwa dang sdang wow yalehke wei da sdang hi ki leh wow pynyoo yei sap yong ki ha ka yalehke bol.
Discussion about this post