I lai luti ka War Jaiñtia Student Union (WJSU) lyngba ka Education Sub Committee neibynta u pynyoh Scholarship ya ki khynnah skur ka thaaiñ Amlarem deiwa pynyakhun da ka Competitive Exam ha kani ka sien wa ar leh da man ko kawa jop, heiwa da em 15 ngut kiwa da chah jied wow yoh ya ka Scholarship wa Rs. 1000 chi bnai neibynta chi snem, ynne ka sngi ka seiñ WJSU da sdang ko wow e ya ka Scholarship cha ki khynnah skur ha ka yalang wa da pynman ha Riwar Jaiñtia Church of God Secondary School Ladjaplem.
Ya kani ka yalang da tip kam ka Follow Up Examination 2025 Scholarship Distribution Ceremony heiwa ki khynnah wa da chah jied wow yoh Scholarship da wan ki wow chim ya ka Scholarship ha deilang ki Certificate wa da e kti da u kongsan u Medling M Swer, MDC ka UDP na War East, u symbood kongsan, u Jamshaphrang Pohtam, MDC ka VPP na War Central deilang ki dkhot wa yahkhmat ka seiñ WJSU.
Neiliang kini ki ar ngut ki MDC ka JHADC hawa klam e mynsien ya ki khynnah skur wow lai ki chakhmat hei puræ puthi da pynkynmoo ki yei lai luti wa maad ki hei im ki kam ki khynnah skur wa angnood u yoh yei tip i stat hanla hapyrdi i chah khanglaad neidaw wa ban i dooh i duk katwa wan ki na ka yung wa duna i yoh i laa.
Ong ki kamwa ki leh ye bait ki u pteiñ yei puræ hapyrdi i eh i khoo, ngait skem ki wa kini ki khynnah skur leh u ye hi ki. Da e mynsien ki deiwa pynkynmoo ya ki kyntien wa ong hawa em i thrang i angnood ym em wa ye u khanglaad yow poi cha katæ ka thong.
Neibynta kitu won ki khynnah skur ki wym pu ye u jop ha ka Competitive Exam yow yoh Scholarship, ong ki wa i chah rem wa maad hei im leh man hi ka laad yow ye u lehbha chooh choh chakhmat khlem randien.
Heijooh i por da yaroh ki ya ka seiñ WJSU wa da chim ko ya kani ka luti kawa ye u ong hanla man iwa khian leh, tangwa man i i yarap wa khroo heiyatoh wa i puræ puthi ki khynnah wa wan na ki manyung wa dooh wa duk.
Neiliang u Jamshaphrang Pohtam ha kani ka sngi da pynbna haroh u wow e yarap cha ka WJSU neibynta chi bnai ka bai Scholarship ki khynnah skur.
Discussion about this post