Ka Dorbar Chnong Tuber Kmaishnong ha ka yalang ka Executive Committee kawa da pynman ha ka 5 tarik uni u bnai da chim ki ya ka rai wow booh da ki kyndon kiwa krehkaam nadooh ka 21 tarik uni u bnai hadooh wa dep u thap Vote ka Election MLA 2023.
Kini ki kyndon wa em 15 tylli man ki kamni ha wah:
Ym chah ya uwon uwon lane kawon kawon ka bru wow tem sur wei wow chaad hapoh ka chnong.
Ka VDP chnong daw khang ko ya ka Gate chnong ha i por wa emkaam.
Ym chah ya kiwon kiwon kiwa na baar chnong lane ki “Leader” wow wan psiah chapoh ka chnong wow wan yalap namo wow Canvas Election.
U e laad du ya ki kyrtong wow wan psiah chapoh ka chnong tangwa khlem kiwa bood lait noh uwa yah kari yong oo.
Lada chem ya kiwon kiwon ki bru kiwa na baar chnong wa wan yalap Election wei kiwa pynbaam poisa, ka Dorbar Chnong wa ka VDP Chnong daw leh ko ya iwa emkaam.
Waroh ki kyrtong MLA ka Election 2023 toh u wan ki du 5 tylli ki kari khian (Light Motor Vehicle) haka sngi wan yalap Election.
U pynman ya ka yalap Election du ha ka chi sngi ya waroh ki kyrtong wei daw e por wei e laad du 2 kynta ya uwi u kyrtong wei ya ka tarik wa i por daw booh da ka dorbar chnong.
Waroh ki kyrtong wa kiwa kyrchaan yong ki toh u biah ki da ka Car Pass kawa da e bor da ka dorbar chnong khnang wow yoh u psiah chapoh chnong heipor wa lai yalap Election.
Ya ka thaw pynman yalap Election daw pynman haka Community Hall, Tuber Kmaishnong du neibynta ki tre chnong lait noh yaki baar chnong kiwa wan synraan ya u kyrtong deiwa yoh Car Pass.
Ya ki tanghæng namo ka Sound System daw pynbiang da ka dorbar chnong.
Ym chah ya kiwa wan synraan lang ya ki kyrtong wow chaad wei wow tem sur hapoh kari.
Kiwa klam toh u em ki du 5 ngut wa kynthup lang ya ki kyrtong lait noh na u Chairman wa pynlai ya ka yalang. Ki tre chnong ym ye ki wow chimbynta haka yalap Election.
Ka chnong u pynkrehkaam ko ya ki kyndon yong ka Election Commission of India khamtam ha i por wa yalap Election ha chnong wa ki kaam huri hura.
Haka sngi niaw Vote, kiwa kyrchaan yong u kyrtong wa jop ym ye ki wow chaad hapoh chnong, ye ki wow chaad ha ka sngi wa baamdoh tangwa cha baar ka chnong.
I pyntip na u Waheh Chnong wa u Secretary Chnong ka Tuber Kmaishnong.
