U Montri ka sorkar pyrdi wa pait ya ka puræ puthi, u Dharmendra Pradhan ynne da lai embynta lang u haka XXVII Convocation ka North Eastern Hill University (NEHU) kam u kongsan yow saam ya ki Degree neibynta u snem 2020 wa 2021 ha ka yalang wa da pynman ha NEHU Campus, Shillong.
U Pradhan hawa e yei klam da e khublei wei da pyneh-nasib u ya kiwa da pyndep ya ka puræ puthi, da klam u leh chaphang ka NEP 2020 yow pynkylla yaka puræ puthi nadooh wa dang khian wei wow pynchlur leh wow puræ ya waroh ki jait ktien wa em hapoh India deiwa e khublei ya u Prime Minister, Narendra Modi yei ban joor u wa emkaam waroh ki jait ktien, ym em kawi kawa rap kor ya kawi.
Neiliang u Montri Rangbah ka jylla Meghalaya, u Conrad Sangma uwa da embynta lang da pynclur u wow pyrchang u man kiwa chlur wow leh da kiwa rap eh ki kaam wei ym toh u dooh mynsien lada ym mankaam wei ym toh leh u khyllew manda yoh yei yop.
Ha kani ka sngi da saam 15,955 tylli ki Degree heiwa na kini 117 tylli toh ki PhD, 8 tylli ki M.Phil, 1559 tylli ki PG Degree wa 14,271 tylli ki Bachelor Degree.
Da emlang leh ha kani ka sngi wa u Montri ka chnat puræ puthi ka Meghalaya, u Lahkmen Rymbui, u Vice-Chancellor ka NEHU, u Professor P.S. Shukla, kiwa sikai wa kiwa lai puræ ka NEHU.
Hadien ini, u Pradhan da lai u leh cha ka Umsning Presbyterian School heiwa da pynchlur u ya ki khynnah wow booh thong yow man kam ki Neurosurgeon, Pilot, Engineer, kiwa yalehbol, kiwa tem wa put wei wow man kam kiwa yahkhmat ka mynried kiwa daw mih napoh kani ka skur.
