Kiwa sikai Samagra Shiksha Abhiyan (SSA), hapoh ka All Meghalaya SSA School Teachers’ Association (AMSSASTA), da rai ki wow pteiñ bait ya ka yakhih chong kyllaiñ myngngor ha madan Malki hadooh wa ka sorkar u leh ko iyi iyi hajrong i dawa pynku tulop da 100%.
Ka yakhih kiwa sikai hapoh ka lama ka AMSSASTA da kynjoh cha 16 sngi yow pynbor ya ka sorkar wow pynku noh ya ka tulop da 100% wei wot hapyrdi kani ka yakhih kiwa yahkhmat da lai ki leh wow yaklam wa ki heh ka chnat puræ puthi ka jylla yow pynman kaam yei dawa, heiwa ynne ka sngi kiwa sikai SSA da yachem ki wa u Commissioner Secretary wei kamjooh ya u Montri ka chnat puræ puthi, u Rakkam A Sangma.
U Vice President ka AMSSASTA, u Defender S Lamare da khana u wa ha i yachem wa u Montri, da khana u ya ki laad ki luti wa da lai ka sorkar, tangwa daw chimpor neibhah yei kaam da e kti cha ka Education Commission yow bichaar bniah, wei ka sorkar dang yang ko ya ka Report na ka Commission.
U Defender da ong u wa neidaw wa ka sorkar da sdang ko wow ban bichaar yei dawa yong ki, ka AMSSASTA da yooluti ko wa ka sorkar daw pynsmat ko yei kaam khnang wa kiwa sikai ym chem chitom ki wei yow ye ki wow lai hikai ya ki khynnah cha ki skur, khamtam hadien 16 sngi wa da yakhih.
Discussion about this post