Ka Annual Report on ‘Road Accidents in India-2022’ da pynlait ya ka da ka Ministry of Road Transport and Highways wei ya ka yukheiñ toh kiwa da yoh na ki chnat pulit ki jylla kiwa da pyndap katkam ki kyndon wa da booh da ka United Nations Economic and Social Commission for Asia and the Pacific (UNESCAP) hapoh ka Asia Pacific Road Accident Data (APRAD).
Katkam kani ka Report da em waroh 4,61,312 sien ki ya tyrrah kari ha waroh kawi ka ri ha u snem 2022 heiwa kiwa khlaad da em ki 1,68,491 ngut wei kiwa mynsoo da em ki 4,43,366 ngut. Ini mut i wa da ku da 11.9% i ya tyrrah kari, kiwa yap leh da ku da 9.4% katwa kiwa mynsoo da ku da 15.3% hawa nujor wa u snem 2021.
Na kiwa yap 61,038 ngut toh na iwa jia ha ki National Highway katwa 41,012 ngut toh ha ki State Highway.
Deiwa kheiñ won kiwa yap na man 100 sien wa ya tyrrah kari, ka jylla Mizoram da em ko boon dooh deiwa yoh 85, hei wa ar ka Bihar 82.4 wei hei wa le ka Punjab 77.5 katwa ka Meghalaya da em ko hei wa ynru deiwa yoh 65.9. Ini pynyoo ko wa emkaam ki Trauma Centre yow sumaar ya kiwa mynsoo.
Kiwa duna dooh kiwa yap na man 100 sien wa ya tyrrah kari toh ka Goa kawa yoh 9.0 wa ha Kerala 9.8.
Ka jylla won wa boon dooh i ya tyrrah kari ha u 2022 toh ka Tamil Nadu wa da em 18,972 sien, hei wa ar ka Kerala 17,627 sien wei hei wa le da em ka Uttar Pradesh 14,990 sien.
Ki daw wa jia i ya tyrrah kari toh nei pynhær kari heiwa ha ki National Highway da jia 77,636 sien wei da yap 35,488 ngut katwa ha ki State Highway won da jia 27,276 sien wei kiwa yap da em ki 8,493 ngut.
Na kiwa chah tyrrah ha ki National Highway kiwa lai dei kjat da em 20,513 ngut wei kiwa yap da em ki 10,160 ngut. Kiwa yah thuk-thuk da embynta ki ha 63,115 tylli ki ya tyrrah wei da yap 25,228 ngut.
Deiwa kheiñ won yei boon ki kari deiwa chim man 10,000 tylli ki kari wa i ya tyrrah kari wa jia kiwa yap (Fatality Rate) wa boon dooh toh ha Sikkim kawa yoh 17.0 hei wa ar ka Bihar 9.0 wei hei wa le ka Chhattisgarh 8.4, ha Meghalaya won 4.4 iwa duna ya ka All India Rate kawa 5.2.
Ha u 2022 i rta kiwa yap nei chah tyrrah kari wa boon dooh toh kiwa em 25-35 snem kiwa da em 42,671 ngut, da pynbood da kiwa em 35-45 snem kiwa em 36,051 ngut wei kiwa em 18-25 snem won da em 33,350 ngut kiwa yap katwa kiwa em 45-60 snem da em ki 28,407 ngut.
Kani ka Report da ban joor ko yei emkaam wow wanrah ki kyndon yow pynduna yei tyrrah kari iwa da jia neidaw wa pynhær kari, i yah kari khlem akor, deiwa muiad wei khlem da bood ya ki aiñ pynlai kari. Da ong leh wa emkaam wow pynkhlan yei pynsñiawthooh paidbah, u chna pynmait ya ki sarok kamjooh leh ki kari wa miat.
Discussion about this post