178 ngut wa yoh Governor’s Award ha ka Foundation Day ki Bharat Scout & Guides

Kam chibynta ka 74^th Foundation Day ki Bharat Scouts & Guides, da pynman yaka Rajya Puraskar Rally ynnin ha Raj Bhavan, Shillong.

Neiliang u Lat ka jylla, u Phagu Chauhan uwa man leh kam u Patron ka Meghalaya Bharat Scouts and Guides da saam u ya ki Rajya Puraskar Certificate cha ki 84 ngut ki Scout, 9 ngut ki Rover, 76 ngut ki Guide wa 9 ngut ki Ranger deiwa emlang u Chief Secretary ka jylla, u DP Wahlang, u Secretary u Lat, u Dr. B.D.R. Tiwari wa kiwi de.

Da pynkup burom leh ya ki 7 ngut ki Leader (5 ngut ki chynrang wa 2 ngut ki kynthai) kiwa da pyndep ya ka Himalayan Wood Badge Course.

U Lat hawa e yei klam da yaroh u ya kitu ki Scout wa ki Guide kiwa da pyndep ya ka Rajya Puraskar deiwa ong leh wa kani ka Foundation Day man ko kam wow pynkynmoo yei chynna jngai kiwa da sdang ya ka kiwa sñiawthooh yeiwa bha iwa ki Scouts wa ki Guides ye ki wow leh khamtam yow yah cha ka luti wa bha ya ki khynroo ki khyllood.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Da klam u chaphang kiwa boon ki bru kiwa da chah ktah hei rukom wa bha deiwa man ki kam ki Scouts wa ki Guides, kamtæ da khut u wow burom ya ka yurim ki Scout wa ki Guide wei wow kular u yada wei wow wanrah ya ka rukom im wa bha neibynta ki khynroo ki khyllood yow yoh ki yaka mynried kawa tyrchaaiñ deiwa kular u wa ka daw pteiñ wow kyrchan ya ki Scouts wa Guides hapoh ka jylla.

Neiliang won u Chief Secretary da yaroh u ya ki Scouts wa Guides yei kreh chitom ki wei yei rai kut yow pyndep ya ka Rajya Puraskar wei da e khublei u leh ya waroh kiwa yahkhmat wa yahluti wow e mynsien wei wow pynwandur yoh lai chakhmat hapyrdi i eh wa boon.

Da kdaw u leh yeiwa emkaam wow chakri ya ki bru wei da kyrmen u wa ini daw e mynsien ko leh ya kiwi ki khynroo ki khyllood hapoh ka jylla.

Ha kani ka sngi, u Lat da pynlait u leh ya ka Foundation Flag heiwa ka poisa wa mih neiwa dai daw phah cha ka National Headquarter ka Bharat Scouts and Guides yow pynemkaam neibynta kiwa dooh wa duk hapoh ka ri.

Ka Rajya Puraskar kawa tip leh kam ka Governor’s Award toh ka khusnaam wa heh dooh wa ye u yoh da ki Scout wa ki Guide hapoh ki jylla hadien wa dap ki 13 snem i rta wei da chah sikai ki ha ki Scout Master næ Guide Captain wei hadien da em ka State Level Test wa da leh da ki Trainer kiwa da biang kyrdan.