Ki khynnah ka Meghalaya da jop suk ki ya ki khynnah ka Mizoram da 47 Run ha ka yalehke wa nyngkong yong ki ha ka 1st North East Little Master’s Trophy 2025 wa da pynman ha Guwahati ynnin ka sngi.
Ka Meghalaya da em ki hapoh ka Group A deilang ka Assam, Mizoram wa Arunachal Pradesh. Ka Tripura, Manipur, Nagaland wa Sikkim da em ki ha ka Group B.
Kani ka lympung yaleh Cricket toh neibynta ki chynrang wa em hapoh 14 snem i rta wei da pynman ka da ka Assam Cricket Association.
Ka Mizoram da jop ko ya ka kylla-khlem wei da phah ko ya ka Meghalaya wow Bat chwa ha kani ka yalehke kawa mar 40 Over chiliang. Ka Meghalaya da kamai ko 145/10 na ki 34.3 heiwa ka Mizoram da jubab ko da 98/10 na ki 27.5 Over.
Kiwa boon dooh kiwa poi ki Run cha ka Meghalaya toh lyngba ki Extra heiwa kiwa kawang bol ka Mizoram da e ki 44 tylli ki Wide bol. U Sahil R Marak da dat u 29 Run na ki 37 bol, katwa u Jagrit Thakur da kamai u 20 na 28 deiwa wan u Bat hei chiphaw. U Isac Zomuanpuia (5/23 na 8 Over) wa u K. Lalramthara (4/35 na 6.3 Over) toh kiwa lehbha na kiwa kawang bol ka Mizoram.
U Calvin Syngkli da yoh Wicket u pyn ha ka bol wa nyngkong ka Over nyngkong wei 5 na ki 7 ngut kiwa Bat chwa ka Mizoram da haap ki khlem da kamai chi Run wei ha iwi i por da yoh ki 29/6. Hadien won da wan u Austin Vanlalvenpuia (28 na 28 bol), yow pynslem yei rem wei da ye wow pynhaap lut ya kiwa Bat deiwa kamai ki waroh hapoh 100 Run.
U Sahil da lehbha u da ka bol leh kamwa da leh u da ka Bat deiwa yoh 4/20 na ki 4.5 Over. U Janggo K Marak da yoh u 2/8 na 3 Over wei da yoh Wicket leh u Ashwin Shah (1/8 na 3 Over), u Abhinav Khanal (1/7 na 7 Over), u Calvin (1/16 na 4 Over) wa u Aditya Singh (1/25 na 5 Over).
Discussion about this post