U Montri ka chnat Revenue & Management, u Kyrmen Shylla ynnin ka sngi da wai u ya ka Integrated Health Campaign ha Khliehriat West Community Hall deiwa emlang u A. Baranwal, Deputy Commissioner, East Jaiñtia Hills District, Khliehriat waka Dr. B. Decruse, Project Director, Meghalaya AIDS Control Society deilang wa kiwi ki sahep ka District.
U Kyrmen Shylla hawa e yei klam da pynsñiaw u yei sñiawkhia yei boon kiwa em HIV hapoh ka District wei da khut u yei ya krehlang yong waroh ki chnat sorkar yow lai e yarap ya waroh kiwa chah ktah wei wow pynsñiawthooh ya ki bru wow wan ki chakhmat yow Test HIV wei da kular u leh wow e yarap da ki bru na ka Kyrmen Foundation lada emkaam.
Neiliang u DC da ong u wa kani ka sngi toh ka wow sah kynmoo ya ka District deiwa pyrkhat yei em kiwa chah ktah ha u khñiang HIV hapoh ka District deiwa kdaw wa hapoh East Jaintia Hills da em 2.8% kiwa chah ktah iwa heh dooh hapoh ka jylla wei i daw toh wa joor i sñiawthooh bakla ya ini i kjut hanla biang i sumaar yow ye kiwa chitom u im kamwa im kiwi kiwa chait.
“Katkam ka yukheiñ wa yoh, em kamwa 2500 ngut kiwa em HIV hapoh ka District wei ye u em boon chooh chooh neidaw wym em wan ki bru chakhmat wow Test HIV”, da ong u DC. Kamtæ da ban joor u yei emkaam wow wan phah Test ym du wow yoh yei sumaar tangwa yow yada leh ya kiwi deiwa emkaam u man wa ha kawon kawon ka District 95% toh u chah Test ki yow tip.
Ha kani ka Intergrated Health Campaign daw pynman 63 tylli ki Health Camp deiwa lai cha waroh ki chnong deiwa psiah leh ha waroh ki yung ki sem yow e wyrta chula leh wow Test HIV yow ye u khanglaad ya ini i kjut.
Ha kini ki Health Camps daw Test leh yei kjut Syphilis, Tuberculosis, Hepatitis B, Hepatitis C, Hypertension, Diabetes, Anemia daw pynman leh ya ka Eye Checkup, Dental Checkup najrong wow thap pyrtuid hapoh ka MHIS wei wow leh Aadhaar wa kiwi kiwi de.
Ha kani ka sngi wa sdang da pynman leh ya ka Health Camp ha Sutnga CHC deiwa chimbynta kiwa chong chnong ka Moopala, Mookympat, Sookilo wa Sutnga.
