U District Election Officer, u BS Sohliya uwa man leh kam u DC ka West Jaiñtia Hills District, ynne da pynman u ya ka yalang wa kiwa mihkhmat ki seiñ saiñhima wa kynthup ya ka BJP, AITC, NPP wei da e kti u yei pyrtuid wa khaddooh kiwa thap Vote namo ka Final Electoral Roll kawa da kheiñ hadooh ka 01-01-2023 kiwa da dap 18 snem cha ki soo tylli ki Assembly Constituency kitæ ka 1-Nartiang, 2- Jowai, 3- Raliang wa 4-Mowkaiaw heiwa da emlang leh ki Additional Deputy Commissioner, u P.K. Boro, u M.A Challam, ka D.D Syngai, ka B.Blah, Extra Assistant Commissioner wa u W.K. Kharbuli.
Neiliang u District Election Officer da khut u yei ya krehlang yong waroh ki Party yow pynman ya ka Election wa daw wan kawa khooid wei kawa laitlooid.
Neiliang u MA Challam da khana u cha ki Party chaphang ka Model Code of Conduct kawa da krehkaam mar ya pynbna ya ki sngi pynman Election da ka Election Commission of India wei kawa krehkaam hadooh wa pyndep lut ya ka Election.
Da yaklam leh chaphang kiwi ki kaam wa yatoh waka Election MLA 2023.
Ki pyrtuid kiwa thap Vote ha kani ka Final Electoral Roll yong ki Constituency ka West Jaiñtia Hills District da em ki 2,00,602 ngut kiwa kynthup ya 97,102 ngut ki chynrang wa 1,03,500 ngut ki kynthai.
Ha ki Constituency won man ki kamni:
Ha 1-Nartiang (ST) waroh da em 44,337 ngut kiwa thap Vote heiwa 21,821 ngut toh ki chynrang wa 22,516 ngut ki kynthai.
Ha 2-Jowai (ST) waroh da em 40,208 ngut kiwa thap Vote heiwa 18,954 ngut toh ki chynrang wa 21,254 ngut ki kynthai.
Ha 3-Raliang (ST) waroh kiwa thap Vote da em ki 38,804 ngut heiwa 18,490 ngut toh ki chynrang wa 20,314 ngut ki kynthai.
Ha 4-Mowkaiaw (ST) waroh da em 38,563 ngut kiwa thap Vote heiwa 19,007 ngut toh ki chynrang wa 19,556 ngut ki kynthai.
Ha 7-Amlarem (ST) waroh kiwa thap Vote da em ki 38,690 ngut wa kynthup ya 18,830 ngut ki chynrang wa 19,860 ngut ki kynthai.
