Hadooh ynnin ka 1 tarik, kiwa dang em ya u COVID-19 ha Meghalaya da em ki 1659 ngut heiwa na kini da em 200 ngut kiwa dang sumaar hapoh ki Hospital.
Ya kiwa yoh ya u COVID-19 da yabhah ya ki ha ki soo kyrdan kitæ ka Category-A kiwa ym em iwon iwon i dak i chin wa chitom, Category-B kiwa em ki dak ki chin wa chitom malu mala, Category-C toh kiwa da chitom joor kiwa da chem chitom wow riñ mynsien wa ki Category-D kiwa da emkaam wow booh hapoh ICU kiwa da emkaam yarap leh wow pyndait ha ki kor wa yarap riñ mynsien kiwa tip kam ki Ventilators.
Kiwa haap ha ka Category-A da em ki 24 ngut wei kiwa boon dooh toh kiwa em ha BSF Hospital, Shillong kiwa em 12 ngut.
Ki Category-B kiwa em 81 ngut (kiwa boon dooh na waroh) da em ki boon dooh ha Nazareth Hospital, Shillong kiwa em 19 ngut.
Ki Category-C da em ki 68 ngut kiwa em boon dooh ha Nazareth Hospital, Shillong wa ha Roberts Hospital, Shillong mar 12 ngut.
Ki Category-D da em ki 27 ngut kiwa boon dooh ha Nazareth Hospital, Shillong 8 ngut.
Deiwa kheiñlang waroh ki Category, ka Nazareth Hospital dang sumaar ko ya 39 ngut kiwa yoh COVID-19, pynbood saka Bethany Hospital 25 ngut, Civil Hospital Shillong 23 ngut wa ha Roberts Hospital 20 ngut kiwa boon dooh wa sumaar ya kiwa dang chah ktah ha u COVID-19.
