U Managing Director, National Health Mission haka kyrwoh wa da pynlait u ynne ka sngi da pyntip u wa ka e dawai yada na u COVID-19 kawa da wai paidbah da u Prime Minister ka India, u Narendra Modi da pynman ya ini ha ki 3,006 tylli ki thaw heipor wa sdang yaka.
Da pyntip u leh hapoh ka jylla Meghalaya da pynman ya ini 10 sien (Session) ha ki 9 District kiwa da booh haka sien nyngkong namo ka First Round ini i e dawai.
Kiwa da yoh ya ini i dawa COVISHIELD Vaccine toh 100 ngut ha NEIGRIHMS, Shillong, 24 ngut ha Mawphlang CHC, East Khasi Hills District, 60 ngut ha Resubelpara CHC, North Garo Hills District, 100 ngut ha Jowai Civil Hospital, West Jaiñtia Hills District, 101 ngut ha Ampati Civil Hospital, South West Garo Hills District, 49 ngut ha Umsning CHC, Ri Bhoi District, 100 ngut ha Sutnga CHC, East Jaiñtia Hills District, 100 ngut ha Nongstoin CHC, West Khasi Hills District, 98 ngut ha Holy Cross Hospital, West Garo Hills District wa 100 ngut ha Williamnagar Civil Hospital, East Garo Hills iwa da poi waroh 832 ngut ha waroh kawi ka jylla.
Kani ka e dawai tika toh deiwa da jied chwa nyngkong ya kitu kiwa emkaam nyngkong heiwa da jied ya ki wakreh hei chait i khiah ka sorkar kamjooh ki yong ki bru samen kiwa daw e chi bhah chi bhah chwa.
Ha ini i e dawai da pynemkaam leh yaka Co-WIN, ka App wa chna da ka Health Ministry yow ye u booddien hadooh katwon tylli ki dawai wa da dep e, katwon wa dang sah kamjooh kiyi de kiwa da dep yoh ya ini i dawai.
Hadien ki wakreh hei chait i khiah wa kitu kiwa toor hakhmat dooh namo kiwa tip leh kam ki Frontline Workers da yoh ki ya ini i dawai, daw e won sa ya kitu kiwa em 50 snem chaneiñ wei kiwa em chwa yei chitom. Hadien ini daw e won cha waroh kitu kiwa emkaam.
I e dawai toh iwa arsien iwa man 2 hadooh 4 tayaw u e yeiwa ar hadien wa dep e yeiwa nyngkong (iwa chong hei jait dawai). Daw e leh yaka Certificate cha kitu kiwa da pyndep yei yoh dawai.
Yaka bynta wa 2 namo ka Phase 2, i rukom thap pyrtuid wa kiwi kiwi daw pynbna chwa wow leh biang yei e dawai.
Da pyntip leh wa i e dawai daw pteiñ i wei ka sorkar i thmu yong ka toh wow e yei dawai cha waroh ki wakreh hei chait i khiah heipor wa duna heiwa ynne ka sngi wa sdang da ye wow pyndep 92% i e dawai iwa da pynsñiaw skem yeini i e dawai tika (Vaccine).
