U Montri Rangbah ka jylla, u Conrad K Sangma da ong u wa ka sorkar da rai ko wow pynyaar yei pynkrehkaam ya ka Meghalaya Integrated Transport Project (MITP) neibynta wow pynsuk yei lai i wan, deiwa wanrah ya ki kari kiwa daw e kaam e jaam leh ya kiwa chong chnong najrong kiwi ki myntoi ya ki paidbah.
Hawa klam ynne ka sngi da ong u wa lyngba kani ka MITP, ka sorkar kwah ko wow pynkrehkaam ha ki soo bynta, kawa nyngkong wow pynkrehkaam ya ki Electric Bus neibynta ki paidbah, wei ya ini daw wanrah chwa kattu katni tylli ki Bus kam wow sdang yow paitbniah leh kammon kani ka rukom u yarap ko hachwa wow lai chakhmat.
Kawa ar toh yow wanrah ya ki School Bus kamwa da thmu wei ya ini daw pynbait da ki chnat sorkar kammon wow pynlai ya kitai ki Bus deiwa e cha ki seiñ wa ye wow leh ya ini i kaam, wei ini i thmu toh wow pynkyllooid ya ka sor Shillong nei sahkut kari.
Kawa le toh wow wanrah ya ki kari wa syad dor wow kit ya ki paidbah khamtam kiwa uiñke suwari deiwa thied kamwa 200 tylli ki kari ‘Innova’, wei ya kini ki kari daw e cha kiwa seiñ khih da idæ wei ka Subsidy daw e 50% da ka sorkar jylla wa 50% daw hap wow pyndap da kiwa thied lane lyngba ka ram lyngba ki Bank.
Da ong u wa i wanrah ya ini toh neidaw wa duna ki kari wa rap bha wa kit ya kiwa uiñke suwari neibhah wa boon kiwa yah kari ym joh bor ki wow thied, tangwa lyngba ini i thmu daw ye wow kyrchaan leh ya kitu kiwa yah kari wei kamjooh wow kyntu ya ki kaam uiñke suwari ha ka jylla.
Kawa soo wa u Montri Rangbah da pynsñiaw u wow pynkrehkaam da ka MITP toh neibynta ki kari ‘1917’ kiwa kit ya ki mar rep, wei ini leh da booh wow thied 200 tylli ki kari Pickup wow e cha ki warep wa kiwa seiñ khih, ha kani leh daw e ka Subsidy wa 50% da ka sorkar jylla wa 50% toh u man ko na kitu kiwa kwah u chim ya ki kari wei ye ki wow chim da ka ram na ki Bank.
