I pep skur chiteiñ por da wanrah ko yei sñiawkhia wa joor ya ka sorkar jylla wa du ha ka Class-X hadooh Class-XII, kamwa 20,000 ngut kiwa da dam noh ha u snem 2020-21.
Hawa klam ynne ka sngi, u Adviser ka chnat puræ purti, u Himalaya Shangpliang da ong u wa katkam ka Report da em 20,000 ngut ki khynnah kiwa dam skur noh hapyrdi ka Class- X wa Class-XII ha u snem 2020-21. Da ong u wa i pep skur ha ka jylla dapoi ko cha 21% wei ini da man ko iwa heh bha.
Yow pyndooh yeini, u Himalaya da ong u wa ka sorkar da phah ko wow puræ bniah ya ki daw wa jia ini wei daw wanrah yei e yumut yow pynbait yeini i eh.
“I dam skur chiteiñ por ha ka kyrdan Secondary da man ko 21% wei yow tip yei tre, daw hap puræ bniah ya ki daw wa pynpoi cha ini i dam skur chiteiñ por wei wow e yumut kammon wow yaleh ya ini i pep skur ki khynnah”, da ong u Shangpliang.
Katkam i khana u Shangpliang, ha u 2020-21, i pep skur da ku 20,000 ha Class X-XII wei ini ye u man na i daw wa sah Class, wym lait ha ki Exam, wei i wym ye u lai puræ cha kyrdan wa chajrong, næ ye u man wa leh i dooh i duk wa kiwi de ki daw. “I da yoo i wa ha ka Class-I wa Class-II le hem kiwa pep skur wei emkaam wow thih bniah yow tip ya ki daw”, da ong u Shangpliang.
Dang ini wa dep ka sorkar jylla da chim ko wym pynkrehkaam ya ka New Education Policy (NEP) yow pynduna yei pep skur ki khynnah wei u Montri da chna u ya ka Committee yow pynwandur biang ya ka Education Policy ka jylla yow pynsariem wa ka NEP.
“Daw rap pynlai yumut yei puræ wa ye u pynyoh kreh nadooh Class-VIII hadooh Class XII, khnang wa kitu ki wym kwah wow lai puræ chakhmat ym pep skur ki wei daw ye ki wow yieñ ha ki kjat yong ki hi”, da ong u Shangpliang.
Heijooh i por da ong u wa kiwi won toh iwa duna ki skur Higher Secondary ha ka jylla wei da kyntu u ya ki Managing Committee yong ki skur Secondary wow kyrpaad ki ya ka sorkar wow wai ya ki Higher Scondary.
Da kyntu u leh ya kiwa sikai wow em ki i kitkhlieh hanla em chiboon i eh neibhah ka sorkar ym ieh ko ya ki, wei da maham u wa ki ymtoh u leh stiñ ki yei kaam yong ki, katwa neibynta ki skur kiwa duna ya kiwa sikai wow pynsmat ki wow khut Interview noh ya kiwa da pyndep ya ka MTET katwa ye.
“Em leh i duna ki skur Higher Secondary. Hadooh katni em ki 1452 tylli ki Secondary School, 386 tylli ki Higher Secondary, wei boon ki khon khynroo khyllood ka jylla chem chitom ki wow yoh u psiah thaw puræ neidaw wa duna ki skur”, da ong pynrap u. “Ka sorkar daw pynchlur ko yow wai boon ki Higher Secondary wei kyrpaad i ya ki Managing Committee ki skur Secondary wow kyrpaad ya ka sorkar wow wai ya ki Higher Secondary”.
Da ong u leh wa em i duna kiwa sikai ha ki skur wei em kiwa sikai kiwa pyndep ya ka MTET wei ka sorkar daw pynman noh ko ya ka Interview. U Shangpliang da kyrpaad u ya kiwa sikai ki wym yoh tulop biang por, wym yoh yei su wa tikna, ki wym thungkaam pura wa ki wym yoh baibaam tymmen wow chimkhia ki neibhah wa ka sorkar daw pait ko yeini i eh yong ki.
“Da em ki Report wa kiwa sikai ym lai hikai ki cha ki skur, da pynlut por ki ha kiwi won ki kaam, kiwa e nong wow sikai da kiwi. Kiwa sikai toh u man ki kiwa kitkhlieh ya ka mynried yong ki khynnah wei ka sorkar leh daw pait ko ya ki”, da ong u.
Em ki skur ki wym ye wow lehbha ha ki Exam SSLC, wei ka sorkar da chimkhia ko ya ini. Ka sorkar daw e laad ko wow pynbha ya idæ wei ka sorkar daw bichaar ko yei kreh hok yong ki, da ong chooh chooh u.
