Jowai: I pyrchang wow pynlait ya ki 13 ngut wa chah kset hapoh i krem mooyong ha Ksan, East Jaiñtia Hills nadooh ka 13 tarik uni u bnai dang pteiñ i hadooh ynne ka sngi heiwa da embynta nadooh ki NDRF, SDRF, Home Guards & Civil Defence, ki pulit wot hadooh ki bru paidbah.
Hawa yaklam wa u Asst. Commandant ka NDRF u SK Singh da pyntip u wa neiliang ki bru ka chnat da yaleh ki u thooh laad katwa ye wei manda ye u pynhiar ya ka um hadooh i bynta wa ye ki u psiah cha ki thlu mooyong daw ye ki u psiah chapoh wow pynlait ya kini ki 13 ngut.
Da pyntip u leh wa ki bru wa pliah wow ngam um (Divers) man i iwa eh ya ki wow ngam ki palat 30 phut ka um wei du hadien wa ye u pynhiar ya ka um du heitæ wow ye wow lai chaphrang.
U DC ka District, u FM Dopth da ong u wa katkam wa man katni em soo tylli ki kor (Pump) wow sai ya ka um wei hadien wa da sai ya ka ynnin, ynne i step won da ku biang ko heijooh, katwa kamtæ da emkaam chooh ya kini ki kor wei neiliang ki bor ka District daw yaleh ki wow pynbiang ya ki wei da paan yarap leh wot na ki bru samen hajrong ini i emkaam.
U Incident Incharge (Water Resource) u Risbon Tongper, da pyntip u wa kani ka krem ko em ko rap hajrong (loom) hawa wyrchaw wa kiwi kiwa em hajan wei yillu ko kamwa 320 Feet wei ka um em ko kamwa 70 Feet wei kiwi ki krem wa em hawah ka um em ko kamwa 20 Feet.
Da ong u leh wa ye u man wa nei piah i chram wa yajan kani ka krem (wa em kini ki 13 ngut) wa kiwi tawon ki krem mooyong, kamtæ da liat ka um na kini kiwi cha kani ka krem wei wa yajan ko wa ka Wah Leteiñ ye bha ko u ktah yei psiah um cha kani ka krem.
Heijooh i por da pyntip u wa katkam wa kam ki bru wa tip bha ya ka thaw wa kani ka kaam tih mooyong, da emkaam sa kamwa 30 tylli ki kor (pump) wow sai ya kani ka um wei emkaam u sai ya ka ym du na kani ka krem tangwa na kiwi kiwa em hajan yong ka khnang wow ye u pynhiar ya ka, wei lada pynemkaam 30 tylli ki kor ye ko u chimpor hadooh 21 sngi wow sai lut ya ka um.
Discussion about this post