Ki Hospital ha kylleiñ ka Meghalaya da sangeh ki u kreh ha ki Outpatient Department (OPD) wa kiwi ki kreh ki wym jhan namo ki Non-Emergency kamwa 24 kynta kam chibynta i yakhih wow pyrchah ya i chah tynyap wei chah slaitbor ka Doctor ha RG Kar Medical College and Hospital, Kolkata ha kani ka tayaaw wa dep.
Ha NEIGRIHMS, ki Resident Doctor, kiwa puræ MBBS wa ki Nurse da yakhih ki deiwa jai-jai hapoh u pood kani ka thaw sumaar kam chibynta i yakhih wa da khut da ka Indian Medical Association (IMA).
U Dr. Indranil Banerjee, General Secretary ka North Eastern Indira Gandhi Regional Institute of Health & Medical Sciences-Resident Doctors’ Association (NRDA) da ong u wa ini i yakhih toh wow pyrchah ya ki kaam wa ktah ya ki Doctor kynthai wa neibynta ki hajar ngut ki kynthai kiwa man kam ki Resident Doctor ha waroh kawi ka ri.
Ka NRDA da dawa ko leh yei takit wa khooid wei wow pynchitom ya kiwa emkti u slaitbor wei wow tynyap ya ka Doctor ha Kolkata.
Da dawa leh wow pynman aiñ ya ka Central Protection Act for Healthcare Workers hapoh ka Parliament khnang wow chngaaiñ kiwa kreh ha ki thaw sumaar.
Ha Bethany Hospital leh da sangeh ya i kreh ha OPD kamjooh leh ha ki chnat kani ka Hospital kiwa em ha Shillong, Nongpoh, Umsning wa Byrnihat. Kamjooh leh ka Supercare Hospital da khang ko ya ki OPD neibynta 24 kynta nadooh ynne 6:00 waje i step hadooh 6:00 i step ka 18 tarik tangwa da pyntikna leh wym thut i sumaar yeiwa rap jhan.
Ki Doctor sorkar ha kylleiñ ka Meghalaya da deiñ ki ya ki lama rong yong hapoh ka seiñ Meghalaya Medical Services Association (MMSA) kam chibynta i yakhih ka All India Federation of Government Doctors’ Association (AIFGDA).
Discussion about this post