Ynne ka sngi kawa man leh ka sngi khaddooh ka Durga Puja ha uni u snem, heiwa 54 tylli ki Durga Puja Committee ha Greater Shillong da pyndep ki yaka niam pynngam um ha ka Ghat wa em ha Polo.
Ha uni u snem neidaw wa em ka khlam COVID-19 wei kamwa da ya pynbiat da ka Central Puja Committee, da chah du ya 24 tylli ki Committee wow pynngam ki ya ki dur Blai, wei i pynngam um da man ko kawa lai bait kawa da leh da ki Durga Puja Committee.
Da chah du 15 ngut ha kawi pa kawi ka pynnggam dur Blai kiwa da wanrah da ki 3 tylli ki kari khian wei ym em chah wow em kiwa bood deiwa lai kjat, ki yalang paidbah kamjooh kiwa wan paitke katkam ki kyndon. Ya ini waroh da pyndep kamwa da pynbait ha i por 3 waje i sngi wei ya i pynkhooid ya ini i thaw da sdang wei daw pyndep mynstep ka sngi.
Neiliang ki bor District da e khublei ki ya ka Central Puja Committee wa ki Durga Puja Committee yei pynkreh bniah wei yei kreh chitom ki wow pyntikna wa da bood yaki kyndon neibynta ka lehkmen ya uni u snem kamjooh yeiwa bood yaki kyndon yada yaka rymaw heipor wa pynngam um.
Hanla ka lehkmen ha uni u snem man ko kawa khian, man ko leh kawa chongkun wei kawa em i suk i kmen. Ki Sector Magistrates, Police, Traffic, Shillong Municipal Board, DIPR, Volunteers wa ki bru naka chnat i chait i khiah da krehlang ki wa ka CPC yow pyntikna wa kani ka lehkmen man ko kawa lai bait lai ryntih wa kawa dei suk dei saiñ.
