Da man ka sngi wa pynkmen ya ki bor pait bor pynlai heiyatoh wa ki kaam Sport hapoh ka West Jaiñtia Hills District nadooh ka yung krehkaam u District Sports Officer, ka West Jaiñtia District Sport Association heiwa i angnood yong ki u pynmiat pynbha ya ka madan Kiang Nangbah Stadium Jowai ym slem de da mankaam ko neibhah u Symbood Montri Rangbah ka sorkar jylla, u Sñiawbhalang Dhar da kular pynyoh u ka mang poisa wa T. 25 klur tam neibynta u chna pynbha pynmiat ya kani ka madan kamwa da dep e dei thoh cha oo khang yow man ko kawa biang ha waroh ki liang.
Yeini da kular u ha ka 22 tari hawa klam kam u kongsan ha ka yalang pynhaap pyrda yei lehkmen dap 50 snem i lai luti ka West Jaiñtia District Sport Association (WJDSA) ha madan Kiang Nangbah Stadium wa da emlang u Montri ka chnat Sports and Youth Affairs, u Shakliar Warjri, u MLA ka Jowai u Wailadmiki Shylla, u District Sport Officer West Jaiñtia Hills, u K. Passah, ki dkhot ka WJDSA wa kiwi kiwa chah khut sñiawbha.
Hawa klam ong haroh u wa sñiawthooh hi hei lai luti wym em iwi wot iwa suk tangwa toh u em ka thong u yakhun hadooh wa jop.
Kop haroh u ya ka sorkar wa yahkhmat da ka NPP deiwa ong toh ka sorkar kawa booh yei kaam Sports hakhmat dooh nadooh u 2018 deiwa chimkhia ko ya kani ka chnat wei boon ki madan yalehke wa sahdien ha ki thaaiñ waphær leh da yoh Artificial Turf ki, wei han lym pu ye u pynbiang lut yei emkaam tangwa da leh ko yeiwa bha tam.
“Wym em kular O heipor wa e dorkhat ka WJDSA neidaw wa da jan Election ya boi wym ye u leh iyi iyi, tangwa embhah ha kani ka kynti da wan biang i hei bor kamtæ kani toh ka bynta i roi i paar wa nyngkong dooh ha Riloom Jaiñtia neibynta i myntoi ka Constituency wa ka District waroh kawi,” ong u Sñiawbhalang Dhar.
Neitæ kular haroh u wow e T. 10 lak ya ka WJDSA neibynta u pynlai ko ya ka Open to All Tournament ka wow e naam hei pyrtuid u pa yong oo u (L) Kesilroi Pala. Heiwa ka T. 5 lak toh neibynta ka song poisa katwa T. 5 lak won neibynta ki emkaam wow pynlai ya ka Tournament.
Neiliang won u Montri ka chnat Sports and Youth Affairs da yaroh u ya ka WJDSA kawa jooh pynmih boon ki bru em sap ha ka Sport kiwa da mihkhmat wot ya ka jylla hei yalehke waphær waphær.
Kamtæ kyntu u ya ki khon khynroo khyllood wa em sap hei jait yalehke waphær wow minot ki neibhah neiliang ka sorkar leh u e mynsien wei u emlang ko wa ki khnang wa i sap yong ki wym kut i du ha kam kini ki madan tangwa wot hadooh u man ka laad kamai ja kpoh ya ki.
Heiyatoh wa kani ka madan won ong u wa neiliang yong oo leh daw pait kyrpang u iyi wa ye u wow leh iwa bha tam.
Ha kani ka sngi neilang ka WJDSA da pynkup burom haroh ko ya ki Referee ka District, kiwa yalehke (Athletes), kiwa yalehbol wa da mihkhmat ya ka District ha ki lympung waphær waphær.
Neitæ da e khusnaam haroh cha ki dkhot yong ka Association kiwa da khlaad noh na kani ka pyrthai kam ka dak i burom yei yahluti yong ki ya ka Association.
