Jwai: 26 ngut ki khynnah kynroo wa kynthup chynrang wa kynthai da ioh ki ia ki ID wa ki uniform yong ki ynne ka sngi ha ka ialang wa man ha C.T.C Orchid Inn Hall, Thadlaskein.
Ia kani ka esikai wa chibnai da pynkhreh da ka Institute of Hotel Management (IHM) Shillong ha CTC Orchid Inn, Thadlaskein, kawa daw sdang nadooh 17 tarik uni u bnai. Ha kani ka esikai chet tyndur daw sikai kammon u chet ha ki tyndur ka juk wa man katni. Daw sikai ia ki kammon u chet ia ki ruti, ki bam dih cha, ki cake wa kiwi waboon jait ki baam wa thymme wa ki bru katni da sdang ki u ka-it u bam.
Da jied u esikai chet tyndur ia kini ki 26 ngut wa wan cha khmat hawa da chem wa da boon ki dukan ha Jwai da sdang ki u dai ki bam chet tyndur waphær waphær kiwa wan rah na Shilllong. Kamtæ yow pynchlur ia ki khynnah khynroo u yieñ ki ha ki kjet iong ki kamjooh leh u chim kabu ia kani ka iaw ki baamtyndur, da pynman ia kani ka esikai chet tyndur da i kyrchan poisa na ka Ministry of Tourism iong ka sorkar India.
Boon na kini ki 26 ngut toh ki wa dang lai puræ, yow dam ki u pep chiteiñ por, daw ia bhah ia ki ha ki kynhun wa boon tylli hei iatoh wa i por wa lait ki u wan cha kani ka esikai. Kamjooh leh daw e poisa bai lai bai wan ia kini ki 26 ngut kam wa u pynchlur ia ki u wan ki man ka sngi cha kani ka esikai.
Yow e mynsien ia kini 26 ngut ynne ka sngi u DC ka West Jaintia Hills da ong u wa sniaw kmen u yoo wa em ki khynroo kiwa chlur u pyrchang da i waphær wei wa ym em pynbood yongton ki iong kiwi. Kamjooh pynchlur u ia ki u li pyrchang ki u kreh næ dai ia ki mar chet iong ki neini cha khmat cha bar ka jylla leh. Ym hoi u sah kut du hapoh ki district iong-i donhi.
U Manager ka bank IDBI ha Jwai da ong u wa ki bank leh smat ki u e ram cha ki bru wa kwah u sdang khih waphær wei kiwa da biang itip wei da pliah u khih.
U principal ka IHM u Vijay Kumar ong u wa da boon kiwa tipmit u kiwa em ha kani ka lain chet tyndur kiwa katni da ye ki u pyllai cha boon tylli ki dukan wa ki hotel kylleiñ ka India. Kamtea kani ka khih ye ko u iah ia ki cha waroh ka ri kamjooh leh cha bar ri.
U manager ka DIC, Jaintia Hills u ma P. Toi ong u waka ophis iong Oo leh da dep phah ko chisein ia 32 ngut ki bru na ka distrik cha IHM, Shillong ia ka esikai wa 20 sngi tangwa boon na ki ieh ki chiteiñ wa joor i kynmoo yung ki. Ong u dap dei snaiw kmen wa ye u Ma S.K. Lato u wanrah ia kani ka esikai chajan chnong iong i.
U ma S.K. Lato da ong u leh daw e lad ia ki jing chet kini ki 26 u mad ki paidbah ha ka Central Café khnang yow sniawthuh ki ia i bang na ki paidbah wa boon.
Discussion about this post