Kamwa 261 ngut kiwa chah jied ha ki paidbah wow man kam kiwa mihkhmat yong ki namo ki Elected Representatives ha ki 29 tylli ri ka pyrthai em ki i tre (Origin) na India.
Ka Mauritius (45 ngut) toh kawa boon dooh kiwa em i tre na India bood won sa ka Guyana (33 ngut), ka United Kingdom (31 ngut) wa ka France (24 ngut).
Katkam i jubab ha Rajya Sabha, u MP Satnam Singh Sandhu da ong u wa ka Ministry of External Affairs em yukheiñ ko wa ki bru wa em tre na India ksoh ki ya ki kyrdan wa heh wei kiwa emkaam bha ha kiwi ki ri wa ki seiñ ka pyrthai kiwa pawnaam. Ini da yarap i ya ka India wow ku kyrdan bha ha ka pyrthai iwa da pynmyntoi ya ka ri ha kiwa boon ki liang.
Ha Canada em 22 ngut ki MP ha ka House of Commons wa em i tre na India iwa da ku na ka 17 ngut ha ka sorkar warim.
Ka Suriname kawa man ka ri ha South America em ko 21 ngut, ka Trinidad & Tobago 18 ngut, Malaysia wa ka Fuji mar 17 ngut.
Ha United State of America em 6 ngut kiwa chah jied ha ki paidbah kiwa em i tre na India.
Kam wow kdaw heini, da em hadooh 3.43 klur ngut ki bru kiwa em i tre na India kiwa im ha ki 204 tylli ki ri (United Nation em ko 195 tylli ki dkhot ri wa 2 tylli kam ki Non-Member States kam ka Vatican City wa Palestine).
Em du le tylli donhi ki ri wa kynthup ya ka Cuba, Pakistan wa San Marino heiwa ym em ki bru wa em i tre na India namo ki Person with Indian Origin (PIO) næ ki Non-Resident Indian (NRI).
Katkam ka yukheiñ ka sorkar India ha u Duyatra (January) 2025, da em 1,71,81,071 ngut ki PIO wa 1,71,75,122 ngut ki NRI ha kylleiñ ki ri ka pyrthai.
Du ha United States of America em 56.93 lak ngut wa kynthup ya ki 37.75 lak ngut ki PIO wa 19.18 lakh ngut ki NRI iwa bood won sa ka United Arab Emirates wa em 38.90 lak ngut, Canada 36.11 lak ngut, Malaysia 29.35 lak ngut, Saudi Arabia 27.47 lak ngut, Sri Lanka 16.07 lak ngut, South Africa 13.92 lak ngut, United Kingdom 13.33 lak ngut wa Australia 9.76 lak ngut.
Ha ki ri kam ka Malaysia, Canada, South Africa , Australia, Mauritius, Sri Lanka, United Kingdom wa Trinidad & Tobago em ki boon ngut bha, ha Singapore wa Nepal em boon ngut ki NRI.
Discussion about this post