Ka wi na ki phlim Khasi wa da yooluti ki paidbah wow pait kawa e pyrtuid ka 9-Lad daw pynyoo noh yaka haka 28 tarik uni u bnai ha Bijou Cinema, Shillong wei ya ini da pyntikna leh da u Director uwa man leh ha i jooh i por u Producer u Commander Shangpliang.
Hawa yaklam wa u Commander Shangpliang uwa man leh ha i jooh i por u President yong ka seiñ kiwa chna phlim ka Meghalaya Film Makers Association wei kamjooh leh u President yong ka Hill Farmers Union (HFU), da pyntip u wa hei yong sakhiat ya kani ka phlim da pyrkhat wow pyllait ha u snem 2019, tangwa na ki daw wa hap rap pynbha chooh chooh da chimpor wei da pynsñiaw u yei sñiawkmen wow yoh pyllait noh ha uni u snem 2020.
Hawa kylli ya i daw wa da e pyrtuid ya kani ka phlim 9-Lad wa hajrong i parom kani ka phlim, u Shangpliang da pyntip u wa i thmu wa kongsan toh wow pynneh pynsah ya i pyrtuid wa yong ka 9-Lad neibhah katni boon kiwa khut noh PB.
Hajrong i parom, da ong u wa ka 9-Lad toh ka thaw wa ki bru im ki wow kamai jakpoh wei boon leh da man ki kam ki heh spah wei i parom leh man ko hajrong i im wei kamai jakpoh lyngba kani ka thaw. Ha kani ka phlim da pynyoo chaphang i kamai lyngba kani ka yaw wei em leh kiwa kamai lyngba ka luti kawa rap phær wei daw tip rap bniah ya ini manda yoh u pait yaka phlim da pynrap u. Pynyoo ko leh yei sih yong ka kyiad, i wym kitkhlieh ka yung ka sem, i chim kabu ya ki kynthai, i pynemkaam bakla ya i bor wei da e ko leh ya i khubor sneiñ wow yut san loom san wah na kiwa boon ki kaam wa sih.
Da ong u leh wa ya i rukom ringdur, acting, editing wa kiwi kiwi man ko katkam ka juk kawa katni wei ye u nujor wa ki phlim Hindi wei ye lah wow pynsakhiat ya ini lyngba i rwai 9-Lad kawa da booh ha YouTube wei kamjooh leh ka Trailer.
Discussion about this post