Shillong: Ka 154 Run na u Punit Bisht da yarap ko ya ka Meghalaya wow kamai 294/5 pyrchah ya ka Uttarakhand ha ka sngi nyngkong ka Ranji Trophy wa pynman ha Dehradun ynne ka sngi.
Ka Uttarakhand da jop ko ya ka kylla khlem wei da rai ko wow kawang bol wei da pynhaap smat ko ya le tylli ki Wicket ka Meghalaya.
U Bisht deilang wa u Yogesh Nagar (91 Run) da pynim ki ya ka First Innings ka Meghalaya heiwa ka 154 Run u Bisht da dat u 19 tylli ki soo run.
Kini ki ar ngut da kamai lang ki 194 Run heiwa u Nagar da haap u hadien wa kamai u 91 Run.
U Gurinder Singh won da wan u wow pyn yohlok ya u wei da kamai lang ki sa 58 Runs hadien wa haap ka Wicket u Bisht.
Kiwa Bat ka Meghalaya kiwa dang Bat chwa wow kut ka yalehke ka sngi nyngkong toh u Gurinder (22 Run) wa u Abhay Negi (7 Run).
Ha iwi tawon i liang ya ka yalehke Ranji Trophy hapyrdi ka Meghalaya wa Mizoram kawa da booh wow pynman nadooh ka 22 hadooh 25 tarik uni u bnai deiwa yaklam u Honorary Secretary Naba Bhattacharjee ka Meghalaya Cricket Association deiwa kdaw wa ka 25 tarik haap ko ha ka sngi Christmas, ka BCCI da monjur ko wa rah tarik noh ya kani ka yalehke cha ka 20 hadooh 23 tarik uni u bnai.
Discussion about this post