Ki Quarterfinal yong ki chynrang wa kynthai ha ka yalehke Basketball ka 2nd North East Olympic Games 2022 da pyndep ynne ha NEIGRIHMS Indoor Basketball Court.
Ka Nagaland waka Mizoram toh du ki kiwa ki chynrang wa ki kynthai dapoi ki cha ka Semifinal, san na ki ynru tylli ki jylla da yoh u psiah kawi ka liang cha ka Semi lait noh ka Tripura.
Ha ki kynthai, ka Nagaland da pynrem ko ya ka Arunachal Pradesh da 40-32 hei step, ka Meghalaya won da jop ko da 68-23 ya ka Assam. Ka Mizoram won da jop ko ya ka Manipur da 60-55 katwa ka Sikkim da jop suk ko ya ka Tripura da 87-12.
Ha ki chynrang, ka Mizoram da jop ko ya ka Sikkim da 89-60, ka Manipur da pynrem ko ya ka Meghalaya da 82-69. Ka Assam da jop ko ya ka Arunachal da 94-44, tangwa kawa heh dooh i yoh Point toh hawa jop ka Nagaland yaka Tripura da 109-85.
Ya ki Semifinal daw pynman mynstep heiwa ha ki yong kynthai, ka Nagaland daw yachem ko waka Meghalaya heipor 10:00 waje i step katwa ka Mizoram daw yachem ko waka Sikkim heipor 1:00 waje i sngi.
Ya ka Semifinal ki chynrang daw sdang da ka Mizoram waka Manipur heipor 11:30 i step wei daw pynbood da ka Assam waka Nagaland heipor 2:30.
