Ka yung krehkaam ka Dorbar Chnong Namdong-B da e khublei ko ya ki paidbah kiwa wan sakhi ya ka Yadaw Rong kawa man ynnin ka 23 tarik u Naisaphra.
Ya kani ka tamasa Yadaw Masi Rong wa jooh pynman man-u-snem ha chnong Namdong B, West Jaiñtia Hills District toh kawa da leh nadooh ki por warim heiwa ki waheh wasian hadien wa pyndep yei rep i riang ha ki lyngkha ki pynthor da pynman ki ya ka Yadaw Masi heiwa da yoh u yachemlang ki khon ka chnong ka thaw kamjooh u beh yadaw ki ya ki masi kiwa da psan da pynheh ki, kamtæ ha kani ka sngi da pynyoo rong ya ki masi ki yong ki.
Ya kani ka Yadaw Rong da sdang heipor 11:00 waje i step deiwa wan wai ya ka da u Paia Dhar wei da yaroh u leh ya ka Dorbar Chnong Namdong-B wa ye ko u pynneh pynsah ya kani ka Yadaw Rong deiwa kyntu leh wow dang kreh chitom chooh chooh ha ki snem kiwa chakhmat yow heh chooh chooh kani ka Yadaw Rong.
Ha ka yalang wa tbian wa pynlai da u Dr. Melinus M Lamin, da yoh leh i kyntien maitphang na u D.S. War, waheh chnong Namdong-B uwa da khana wa ya kani ka Yadaw Rong da leh nadooh ki por nachwa wei da pynneh pynsah ya ka hadooh kini ki sngi, wei ki khon yong ka chnong kamjooh ki khon ka Raij Namdong man ki wa sñiawsuk u ri masi kyrtong yow pynheh pynsngaaid khnang wa manda poi i por Yadaw Rong yow yoh u pynhiar madan ya ki masi ha ka sngi E Yadaw Rong
Ha uni u snem ka Yadaw Rong man ko kawa heh wei man ko kawa jop heiwa ki masi da em ki hadooh 30 jur wei da bhah ha ki 3 bynta heiwa ka Group C man ki masi ki wa rap khian Group B man ki masi pyrdi katwa ka Group A man ki masi heh.
Kamtæ ka Dorbar Chnong Namdong-B da e khublei kyrpang ko ya waroh ki paidbah kiwa wan sakhi ya kani ka Yadaw Rong.
Ha i miet won da em ka Chaad Pyllah (Dancing Competition) da ki khon ka chnong neibhah man-u-snem ka dorbar chnong jooh leh ko kamni ha ka sngi E Yadaw Rong.
Discussion about this post