Deiwa ya ksohktilang wa ka ri waroh kawi da pynman ya ka Blood Donor Drive ha Jowai Civil Hospital Blood Centre, Jowai deiwa ya krehlang waka Woodland WK Hospital, Sabahmuswang, West Jaintia Hills District heiwa da pynman lang ya ka e snaam sñiawbha hajrong ka phang wa ong, “Donate blood and be the reason for someone’s existence”. Ya kani ka e snaam da wan wai da u Treilang Suchaing, MDC Shangpung deiwa emlang ki sahep wa ka Doctor In-charge Blood Centre Jowai Civil.
U Treilang Suchiang hawa e yei klam da pynchlur u ya kiwi leh wow wan chakhmat yow e snaam neibhah ini toh iwa ye wow pynim yei mynsien wa kordor ki bru.
Ka Dr. P. Shylla, In-Charge Jowai Civil Hospital Blood Centre, da ong ko wa kani ka sngi toh kawa emkaam bha neibynta ki Blood Bank ha kylleiñ ka India, heiwa da pynman ya ka e snaam sñiawbha ha i jooh i por.
Ka Dr. Shylla leh da e ko ya ki ktien sñiawngooh ya ka Woodland Hospital, ka Seng Samla Balang Catholic, Mihmyntdu, ka Jingiaseng Samla, Presbyterian Church Jowai kiwa da ya ksohkti lang ha kani ka sngi deilang waka Blood Bank yow pynman ya kani ka sngi kawa jop.
Da khana ko leh wa wa kiwon kiwon ki bru kiwa chait wa khiah kiwa em 18 hadooh 60 snem i rta ye ki wow e snaam wei emkaam ki wow khia 45 Kg chaneiñ kiwa em ya ka Hemoglobin Level wa ym duna ya ka 12.5 hei snaam ki. Chooh chooh da pyntip ko wa ki chynrang ye ki wow e snaam biang hadien 3 bnai wa e snaam ki, iwa mut ye ki wow e snaam 4 sien chi snem katwa ki kynthai won e ki wow e snaam biang hadien 4 bnai wa e snaam khaddooh ki iwa mut wa ye ki u e snaam 3 sien chi snem.
Hachwa ini, u Medical Superintendent ka Woodland WK Hospital, u Dr. D. Das hawa e yei klam da pynsñiaw u yei ktien sñiawngooh ya kitu kiwa da wan e snaam sñiawbha wei da yoh leh yei klam na u F. Synnah, Chairman Seng Samla Balang Catholic Mihmyntdu.
Waroh da em 30 ngut kiwa wan e snaam heiwa da jied ya 27 ngut kiwa kynthup ya 21 ngut ki chynrang wa 6 ngut ki kynthai.
