Da: U C. Pynsakhiat Yeini Kyndiah, Loompyrdi Iongpiah Jowai
Napoh u Trop Ksiar Trop Rupa ka Bei wasa,
Yei man Khlawait dadep phrang chwa.
Wow phah cha pyrthai wow yieñ yaleh,
Cha jngai yow nongchoon u beh.
Man ka 30 tarik Kmaichonglad wa kynmoo,
Ya ki kha kti wa dadep rooid ha’u moo.
Hajar ki r’ta wym plæh de ki,
Yeiwa da chah stieh neibynta ka ri.
Hun mi u pynchah dei yong me i rynyieñ,
Dei suk ya ka pateiñ u pynkieñ.
Yei khia yei chon wa kit wa bah,
Neh i naam mi Woh Kiang Nangbah.
Nadooh u snem 1862 hadooh u 2021,
ki snem wa da phet dalai la 159 tylli.
Laitlooid da yoh wow synchaar pyn da i ya i,
Katni chongbroo won i pyn hapoh ka ri.
Katni kiwa kbai wa kyrha da khlot waki ch’koor,
Wa nga toh u khlawait kylleiñ da poor.
Manda yoh yeiwa mut wa thmu yong ki,
Kitai de ha kdong wa chong klikti.
Ham smai ham kynmoo de yei pyrtuid khlawait,
Katwa i kaam wei leh mar cha wa ngait.
Man-u-snem yow khlawait wym ye u kha,
Ham pynlet wow ong u Khlawait toh nga.
Ngooh yow Blai lada i por wow dawa,
Sa chisien to phah yow Khlawait wa paka.
Kamwa u Kiang dadep leh hei r’ta yong oo,
I yi cha i kaamram nga u pateiñ u pynyoo.
