I chah banbeiñ wei thombor ki kynthai ha ka jylla Meghalaya da ku cha ka 350 tylli iwa da dep jia hadooh u Naisaphra, 2020. Ya ini da pyntip da u Director ka chnat Social Welfare yong ka jylla, u D.D. Shira heiwa da pynsñiaw u leh wa kini ki kaam banbeiñ wei thombor ya ki kynthai ku ki ha ka jylla wa chim jait na ka kynthai.
Katkam ka yutip wa da yoh lum, i jia i chah lehbeiñ ya ki kynthai da boon bha ki naduh u Wisu (March) yong u snem 2020 katkam ka yukheiñ ka sorkar, wei hadien yong ka Lockdown em ki hadooh 90 tylli kam kini ki kaam. Katwa i jia thombor ya ki kynthai wa da yoh yutip cha ka Meghalaya State Commission for Women ha u snem 2020 em ki 114 tylli.
Na ka thup wa da booh da ki pulit næ lyngba ka Police Website, ha u snem 2018 ki jia slaitbor ya ki kynthai em ki hadooh 89 tylli, katwa ha u snem 2019 da hiar kajiak cha ka 85 tylli. I chah rah bor ki kynthai ha ka jylla ha u snem 2018 em ki 35 tylli katwa ha u snem 2019 em ki 25 tylli.
U Shira da ong u leh wa toh i kamram yong ka sorkar jylla wow pyntikna wa chngaaiñ ya waroh ki manbei wa ki kynthai hapoh ka jylla, wei da pynrap leh wa ka chnat pulit wa ka sorkar ki ya krehlang ki wow pynduna wei pyndoohjait ya ki kaam thombor pyrchah ya ki kynthai.
U Director da pyntip u leh wa ka sorkar jylla da booh kyrpang ko ya ki thaw sah yow pyndap pynbiang ya kitu ki kynthai kiwa da chah thombor wei chah banbeiñ, wei yaka One-Stop Centre da wanrah lyngba ka Nirbhaya Scheme.
