Shillong: U Director of Health Services (MI), u Dr. Aman War da ong u wa i yabi u khñiang COVID-19 ha ki thaaiñ khappood yong ka Ri-Bhoi District da suba wa em i poor hapyrdi kiwa chong chnong næ ka Community Spread. Tangwa ya ini, ka chnat i chait i khiah daw pyntikna ko hadien wa da yoh lut ya ka Report wei katni ka chnat dang booddien ko ya ki bru kiwa ye u em hei maa næ kiwa yajan wa kitu kiwa em ya u khñiang kjut.
Da ong u wa ha Ri-Bhoi ha thaaiñ Khanapara da suba wa em ka Community Spread næ wa da yabi na u wakreh ka Greenwood Resort, katwa ha 9 Mer wa 13 Mer ye wow yabi na kiwa lai sumaar ha Assam.
Katkam wa pyntip u DHS, ynne ka sngi da em 26 ngut kiwa yoh thymme ya u COVID-19 ha ka jylla, wei na kini, 5 ngut toh na Baridua, Ri Bhoi District kiwa da yabi na kiwa yoh rap nachwa kiwa lai phah sumaar cha Guwahati, Assam. Da ong u wa kiwa yoh thymme ha East Khasi Hills toh 14 ngut ki BSF wa 5 ngut kiwa chong chnong, wa kynthup leh ya kiwa wan na baar jylla, 2 ngut ki wakreh ka chnat i chait i khiah kiwa yang ha khyrdop kawa em ha Byrnihat wa na kiwa wan khawai bia na Bihar.
Da pyntip u wa na kiwa wan khawai bia na Bihar, kiwa na Keating Road, waroh 13 ngut toh kiwa em ya u COVID-19.
Katkam wa pyntip u Dr. War, ka jylla hadooh ynne 4 waje i janmiet, kiwa dang em ya u COVID-19 toh 352 ngut, ha East Khasi Hills 307 wei na kini, ki BSF em ki 236 ngut, kiwa chong chnong 57 ngut. Na kiwi ki chnat chipai em ki 14 ngut wa kynthup na ka Military 1, Assam Regimental Centre 9 ngut, Air Force 2 wa na Assam Rifles 2 ngut.
Ha Ri-Bhoi em ki 31 ngut, East Jaiñtia Hills 2 ngut, West Garo Hills 8 ngut, South Garo Hills 2 ngut, East Garo Hills wa North Garo Hills mar uwi, katwa kiwa da chiat da em ki 49 ngut wa 2 ngut kiwa yap iwa da poi waroh 403 ngut.
Hawa kylli, u DHS da pyntip u wa ha ka yalang ka sorkar jylla wa ki bor pynlai yong ki chipai BSF, da rai wow pynsangeh noh chwa ya ki BSF kiwa liwan chuti neibhah i maa wa ka khlam daw nang poor ko hapyrdi kini, deiwa pyntip leh wa lada em kiwa hap wow wan jhan, hap ki wow pyndep ya ki Test wa ki Quarantine ha Assam.
U DHS ha i jooh i por da ong u wa i long i man ha ka jylla na u COVID-19 ym em man ko kawa bha, wei da kyntu u ya ki paidbah wa ym toh wow mih cha lait lada ym emkaam wa jhan, deiwa ong leh wa ha kini ki kajiak sngi ka jylla daw sakhi ko yei ku kiwa yoh ya u khñiang COVID-19, khamtam ha East Khasi Hills wa Garo Hills.
