U Montri wa pait ya ka chnat puræ puthi ha ka jylla, u Lahkmen Rymbui da khana u wa em hadooh 36 tylli ki skur Lower Primary yong ka sorkar ki wym em ya kiwa sikai katni.
Hawa jubab yei yukylli wa da wanrah da u MLA ka Liang Pyrchah na Rangsakona, u Zenith Sangma, u Montri da ong u wa i wym em kiwa sikai ha kitai ki 36 tylli ki skur toh neidaw wa da chong-ngiah kiwa sikai wa nei chah kyrriah kaam cha kiwi ki thaw.
Hawa wanrah ye kylli pynrap hapoh ka Yung Dorbar, u Zenith da pynsñiaw u yei sñiawkhia ya ka mynried yong kitai ki skur ki wym em ya kiwa sikai, wei da kylli u leh ya kiwi ki laad wa ka sorkar da chim ko.
Neiliang u Rymbui da khana u wa ka chnat da phah ko ya ki Sub Divisional School Education Officer (SDSEO) wow thung ya kiwa sikai. Da khana leh wa ya katni chipor ki khynnah yong ki skur ki wym em ya kiwa sikai wa hap ki wow lai puræ ha ki skur wa marjan yow lait ki wow dooh yei myntoi.
U Montri da khana u leh wa i wym ye u thung ya kiwa sikai ha kitai ki skur toh neidaw wa mih hukum yong ka Meghalaya High Court wow pynbiang chwa ya ki Roster hachwa wow thung kreh thymme, da pynrap u wa ka chnat hap ko wow lai katkam ki kyndon wa ki aiñ wow pyndap ya kitai ki kaam sikai.
Katkam wa khana u Rymbui hapoh ka Yung Dorbar, na kitai ki 36 tylli ki skur wym em ya kiwa sikai, kawi toh ha East Khasi Hills, kawi ha West Khasi Hills, kawi ha Eastern West Khasi Hills, kawi ha West Jaiñtia Hills, ar tylli ha East Jaiñtia Hills, kawi ha Ri-Bhoi District, chiphaw tylli ha East Garo Hills, kawi ha South West Garo Hills, kawi ha North Garo Hills wa khadynru tylli ha South Garo Hills.
