Ka 3rd Division ka East Jaiñtia Hills District Football Association (EJHDFA) da pteiñ biang ynne da ki yalehke ka Round of 16 deiwa pynman ar tylli ki yalehke kiwa man leh ki yalehke wa khaddooh chwa wow sdang ya ka Quarter Final.
Ha ka yalehke wa nyngkong, ka Pynthorsale SC da jop ko yaka Mutong Youth SC da 2-1.
Ya ka Pynthorsale da thap kool da u Kyrmen Dkhar haka minit wa 17 wa u Amos Phawa haka minit wa 42 katwa ya ka Mutong da thap kool da u Seven Phawa haka minit wa 11.
Ha ka yalehke wa ar, ka Rymbai Madanpynriang SC da jop ko da 6-1 yaka Umrasong SC.
Ya ka Madanpynriang da yoh Hat-Trick da u Donaldo Dkhar uwa da thap kool haka minit wa 4, 32 wa 65, u Rimiki Rymbai haka minit wa 8 wa 75 wa u Baniengskhem Thoo haka minit wa 70 katwa ya ka Umrasong da thap kool da u Jan Mukhim haka minit wa 37.
Kamtæ ka Pynthorslae waka Rymbai Mandanpynriang da yoh ki wow psiah cha ka Quarter Final kawa daw sdang ha ka 14 tarik uni u bnai.
Discussion about this post