Ka 3rd Division ka East Jaiñtia Hills District Football Association (EJHDFA) da pteiñ biang ynne deiwa sdang da ki yalehke Quarter Final kiwa ar tylli.
Ha ka yalehke wa nyngkong, ka Moosianglamare Old SWO da jop ko da 2-0 yaka Tuberchohchrieh SC da ki kool wa thap u Meshwa Lapasam haka minit wa 61 wa 76.
Ha ka yalehke wa bood da kut da 1-1 hapyrdi ka Moosianglamare New waka Lakadong Ummat SC.
Ka Moosianglamare New da yoh ko wow thap kool nyngkong ha ka minit wa 26 lyngba u Firsterjoy Pariat kawa da neh hadooh wa kut ka kylla step. Ka Lakadong da ye ko wow su kylliang lyngba u Edifirst Chadong uwa da thap da ka Penalty yow phah syndon ya ka yalehke cha ka yachut Tie-Breaker.
Kamtæ hadien wa yachut Tie-Breaker, ka Moosianglamare New da jop ko da 5-4.
Da ini i jop, kini ki ar liang da yoh ki wow psiah cha ka Semi Final kani ka 3rd Division wei da ku ki leh cha ka 2nd Division ka EJHDFA neibynta ka samoi wow wan.
Ki Quarter Final wa bood u pyndep mynstep heipor 10:30 i step wa heipor 12:30 i sngi.
Discussion about this post