Ynne ka sngi ka MBOSE da pynbna ko ya ka Result SSLC heiwa da em kattu katni ngut ki khynnah na Ri-loom Jaiñtia kiwa da poi ha i kyrdan Top 20, wei uwi na kini ki khynnah toh u Weibha Nongtdu Lakiang na ka North Liberty Higher Secondary, Jowai uwa da yoh yei kyrdan wa soo ha kani ka Result deiwa yoh Distinction ha ka (E,M,S&T,SSc,HPE,Kh) wei yoh Marks u 567.
U Weibha Nongtdu Lakiang toh u khon ka Maria D. Lakiang wa u Demetrius Nongtdu kiwa sah ha Mihmyntdu.
Hawa yoh u yaklam wa u Weibha da ong u wa i kreh chitom wei i chaniah pyn ya i de daw yarap i wow poi cha ka thong.
Nadooh wa dang khian hadooh kani ka kynti u Weibha da lai skur u ha North Liberty Higher Secondary School, Mookyrdup Jowai.
Da khana u wa neiliang yong oo ym em u pynlut por u boon kynta heipor Exam neibhah wa da khreh kot u nadooh wa sdang u snem kamwa 4-6 kynta chi sngi.
U Principal ka skur u Richard B Uriah da dap u dei mynsien wa kmen yeiwa ye u Weibha wow wanrah naam rah burom ya ka skur khamtam leh ya ka yung ka sem.
Chooh chooh da pyntip u wa ha uni u snem em 96 ngut kiwa yaleh ya kani ka Exam na ka skur heiwa waroh da Pass ki.
