Jowai: Ka HYC ynnin ka 22 tarik da lai khynra ko ya ki baar jylla hapoh ka Sier Lapalang Operation (SLO) ha ka thaaiñ Umiam ha ki thaw wa em ki karkhana waphær waphær kiwa palat kamwa 20 tylli.
Ha kani ka lai khynra wa yahkhmat daka Organising Committee yong ka seiñbei hei emlang ki dkhot ka seiñ kamwa 150 ngut tam, ka seiñ da chem ko wa 400 tam ki baar jylla kiwa kreh ha ki karkhana waphær waphær ym em ki ya ki kot ki sla wa biang kam ka EPIC wow pyntikna ya ki thaw wa wan ki wei ym em ki leh yaka Labour Licence wa ki Trading Licence na ka District Council.
U Organising Secretary ka seiñ u Francis Gee Mawlong da pyntip u wa iwa sñiawphylla wa em ki kattu katni ki karkhana kawa e ya ki Application Form yong kiwa na baar jylla cha wow rah næ tyrwa hi da ki sahep na District Council wei da dep wow e yaka Receipt kawa chong dor T. 700 ka wi. Ka seiñ da chem ko leh wa ya ki Form ym pu em pyndap kiwa em da ki phaw tylli dang em dang sahkut ki ha ka miej yong ki Manager kini ki karkhana katwa yaka Receipt won da dep e cha kiwa kreh baar jylla.
Ha ini i lai khynra ka seiñ da chem ko wa i e kaam yaki Khasi chynrang wa kynthai ha ki tai ki karkhana toh deiwa ñion beiñ wa ym yahap katkam i dor wa da booh da ka sorkar. Kamtæ neiliang ka seiñ da beh ko ya waroh ki baar jylla ki wym em ya ki kot ki sla wei da maham leh ya ki tre ki Manager yong kini ki karkhana wa ym toh wow wanrah næ pynkrehkaam yaki baar jylla khlem yoh ya ka Labour licence na District Council.
Ka seiñ da dawa ko leh na ki Manager yong kini ki karkhana wow pynku noh chi syndon yaka bai mylla sngi yong waroh ki paradoh parasnam ki yong i kiwa kreh da i dor wa da booh daka sorkar.
Ka seiñ da ong ko wa daw boodien ko ya kini ki karkhana wei daw pynjoor chooh chooh ya kani ka Sier Lapalang Operation.
Discussion about this post