Ki bru wa em chadien tangwa i kaam yong ki iwa emkaam bha yow lai biat ka 2nd North East Olympic Games 2022, da man ki leh kiwa rah yei naam i pyrtuid ka jylla hakhmat kiwa yalehke wa kiwi de kiwa embynta.
Hajrong ini da jied ya 400 ngut ki Volunteer kiwa daw yarap nadooh ka 10 tarik hadooh ka 16 tarik uni u bnai yow pynlai ryntih ya kani ka lympung kiwa daw pyntikna wa lai bait nadooh i pynpoi yei baam, i biang ki thaw sah, ki kari, ki dawai dachin, i poi kiwa thoh khubor wa kiwi kiwi ha ki 18 tylli ki jait yalehke.
Kamtæ ynnin ka sngi da pynman ya ka e sikai yow pynsñiawthooh ya kini ki Volunteer ha ka yalang wa da pynman ha State Convention Centre, Shillong heiwa da emlang leh u Director of Sports and Youth Affairs, u Shivansh Awasthi IAS wa kiwi de ki heh sorkar.
Ki Volunteer toh kiwa daw em nadooh wow pdiang ya kiwa yalehke manda poi ki ha Shillong nadooh myntu ka sngi, u yah ya ki cha ki thaw sah kamjooh wow pyntoh pyntne yow man i sah ki iwa sahkynmoo. Ya kini ki Volunteer daw su da ka Stipend wei daw yoh ki leh ya ka bai lai bai wan.
Kawi kawi ka jait yalehke daw em ko jar jiar ki Volunteer wei kiwa rap boon da booh ha ka yalehbol wa Basketball kiwa da antaad wa daw boon ki bru wa wan paitke.
Neiliang u Awasthi da jubab u yeiwa da kylli ki Volunteer deiwa pynkynmoo wa i pyrtuid i naam ka Meghalaya em ko hei kti yong ki deiwa sñiawskem u wa daw leh ki yeiwa bha tam wei hadien manda liwan kiwa yalehke daw kynmoo ki yeiwa bha ka Meghalaya.
Uwi na kini ki Volunteer toh u Jefferson Lyngdoh, uwa da ong u wa kmen bha u wa wan ka North East Olympic Games neibhah oo maya bha u ya ki kaam yalehke khamtam ya ka Football wa Tennis wei na ini daw yoh myntoi bha u kammon wow ya krehlang wa kiwi kamjooh wow pynwandur yei rukom man u.
