Ka chnong Chamcham ynne ka sngi da pynman ko ya i thung ya ki 400 tylli ki tre dieñ nadooh na pchem ka yung dorbar wa ha Chamcham Secondary School chadooh Sahksaw Viewpoint wa ha chi lynter ka wah Myntdu.
Ha ini i thung dieñ da e kti mar kamwa chi Kilometer ya ka Village Defence Party wa ya ar tylli ki Village Organisation kiwa kynthup ya ka Nangkiew Chaphrang wa ka Iaseinlang Organisation.
Chwa u thungdieñ da em ka yalang wa tbian wa da pynlai da u Stop Phawa, u Secretary ka Chamcham, da yoh i klam pdiang burom na ka Meyoe Dkhar wa na u Secretary warim ka chnong u Karlud Dkhar wa na u Tyrnit Pdeiñ, u Secretary ka San Chnong uwa da yaroh wa ka chnong da yaleh ko wow pynneh ya ka rymaw.
Da yoh leh i klam na u Mul Phawa.
Ha kani ka sngi da yoh leh i klam na u MDC ka thaaiñ, u Lasky Rymbai uwa man leh u Deputy CEM ka JHADC uwa da klam wow pynemkaam da ka LPG hawa chet baam.
U kongsan ha kani ka sngi, u Kyrmen Shylla uwa man leh u MLA ka thaaiñ wei u Montri ka sorkar jylla da kyntu u wa emkaam wow pynneh pynsah ya ka rymaw khnang wow yoh ya ka la’ær wa ka um wa khooid.
