Ka High Court ka Meghalaya ynnin da bichaar ko syndon deilang ya waroh ki mukotduma PIL wa da e da kiwa boon wa yatoh wa i tih mooyong pyrchah aiñ, i chalan pyrchah aiñ, ki karkhana Coke pyrchah aiñ wei kini ki PIL da em ki waroh soo tylli.
Heiyatoh wa i phah da ki CRPF wow pait yei kit ya u mooyong wa tih tooh, ka yung bichaar da ong ko wa dang kylli donhi lada ye u phah da ki CRPF tangwa ym em won pynmih hukum wow leh yeini.
Hajrong ka hukum wa da pynmih da u DC ka East Jaiñtia Hills wow tympra ya ki karkhana Coke wa man pyrchah ya ka aiñ heiwa da em leh kawi ka karkhana Coke wa da wan wow kyrpaad hakhmat ka High Court wow pynsangeh ya kani ka hukum iwa da kyntait wow leh wei iwi na i daw wa phah tympra toh wa pynemkaam da u mooyong wa tih pyrchah ya ka aiñ iwa man leh pyrchah ya ka hukum ka Supreme Court.
Da pynche leh wa ka High Court hei puræ ko ya ka aiñ da klam che wa khlem yoh ya ka Constent To Establish (CTE) ymtoh wow chna ya ka karkhana wei kat wym pu yoh ya ka Consent To Operate (CTO) ymtoh wow sdang u krehkaam wei kiwa boon na kini ki karkhana Coke da lai ki chakhmat khlem da yoh bor. Wei hajrong won i pynsangeh ka Supreme Court ya ini i lai tympra ya ki karkhana sa ha West Khasi Hills District wa da pynmih hukum ha ka 7 tarik, daw yang yei rai ka Supreme Court kawa da e bor leh ya u DC wow lai khang tala ya kini ki karhana yow lait ki u krehkaam.
Heiyatoh wa ki heh wa emkti wow pynlai yei tih mooyong pyrchah aiñ kiwa da uiñ laitlooid tangwa da ye wow kem du ya ki chipai wa khian yong ki, u Advocate General ka jylla da pyntip u wa dang kdong ya kini deiwa ya krehlang wa ki pulit ka Assam wei da yoh leh wow kem ya kiwa boon kiwa na Assam.
Heiyatoh won wa i chalan tooh ya u mooyong kamjooh i kit palatpood i wym em ye u pynsangeh, da phah wow pyndait da ki Weigh-Pads ha waroh ki 23 tylli ki Weighbridge wa em ha Meghalaya neibhah kini kiwa kit palatpood da pynsih ki leh ya u sarok. Da phah leh wow kynreh kari wa syndet syndet.
Kiwa yaleh PIL da ong ki wa da em leh kiwi ki jait karkhana wa mih wa pynemkaam da u mooyong wa tih pyrchah ya ka aiñ wei ka sorkar ym em leh ko iyi iyi hajrong ini.
Heiyatoh wa u mooyong wa da dep tih u wym pu em ye wow dai lilam, da pyntip u Advocate General cha ka yung bichaar wa da bood katkam i por wa da booh yow pyndep. Da pyntip u leh da boon bha ki karkhana Coke kiwa da dep tympra chwa wow pynmih hukum ka Supreme Court yow pynsangeh yei tympra ha East Jaiñtia wa ha West Khasi Hills heiwa ha West Khasi Hills da dep tympra 39 tylli ki karkhana Coke katwa ha East Jaiñtia Hills won 5 tylli.
Ha kani ka sngi da wanrah leh ya ka 16th Interim Report yong u Justice B.P. Katakey (Rtd) uwa da thung da ka High Court yow booddien yei pynkrehkaam ya ka hukum ka Supreme Court waka NGT kamjooh yei dai noh ya u mooyong wa da dep tih wei da phah ya ka sorkar jylla wow jubab ki yeiwa da chem hapoh kani ka Report wa thymme.
Ka yung bichaar da pynsñiaw ko leh hajrong i kit wei chalan tooh ya u mooyong deiwa ong wa hanla ka sorkar da kam ko wow kem ya kiwa emkti, kitu won ki bru sorkar kiwa da emkti wow krehlang wa kini ki bru ym em pynchitom ki neibhah da em ki kot ki sla wa pynyoo yei krehlang ki sahep sorkar wa kitu ki bru wa tih mooyong pyrchah ya ka aiñ wei wow kit wei chalan tooh ya u mooyong. Kamtæ da ong wa lada ka jylla ym ye ko wow pynsangeh ya ini waroh, ini i kjut daw pteiñ i.
Puræ leh: Phah pynsangeh ka SC yei tympdung karkhana Coke ha East Jaiñtia
Discussion about this post