Jowai: Ha ka Meeting næ ka yachemlang ki sahep sorkar yong ki chnat krehkaam sorkar waphær waphær waki seiñ wakreh wa kitu ki bru wa im deilang wa u khñiang HIV wa pynman ha Conference Hall u DC, Jowai, da ong wa kani ka kjut smat bha ko u ku hapoh ka jylla khamtam haki 3 tylli ki District wa kynthup yaka East Khasi, East Jaiñtia wa West Jaiñtia Hills wei i daw wa kongsan hi wa smat ku ko toh lyngba i chongkha kulmar, i dih drugs wa kiwi.
Ya kani ka yachemlang wa pynman ha ka 31 tarik u Naichiphaw da pynlai daka Meghalaya State Network of Positive People (MSNP+) chirup i krehlang waka yung krehkaam u Deputy Commissioner WJHD wei da kyrchaan da ka Meghalaya AIDS Control Society (MACS), hajrong ka yurim wa ki sahep sorkar yow ye ki u e yei kyrchaan wa pura ya kitu ki bru wa im deilang wa uni u khñiang kjut lyngba ki Scheme yarap waphær waphær, khnang yow pynku yei bha i miat i rukom im yong ki.
Hanlada ya uni u khñiang kjut wym ye wow sumaar yow pynwiar, tangwa dei chlur ki bru wow wan chakhmat ye ki wow yoh i sumaar wei ye ki u im u kreh u khih kamwa man kiwi tawan ki para bru haka imlang sahlang.
Heijooh i por da kyntu wym toh u yoobeiñ ne klam beiñ ya ki bru wa im wa ini i kjut neibhah nalor wa chah ktah ki hei bor i doh i pran ye ki leh u chah ktah yei bor pyrkhat yong ki, wei katkam ka aiñ leh da khang pyrchah neibhah ki leh em ki ka hok u im kam kiwa boon wa lang.
Kamtæ da khut wei kyntu yaki bru wa em ya uni u khniang wow wan ki chakhmat wow Register hapoh ka ART Center wajan, ka thaw wa ki ye ki u yoh yei sumaar, heijooh i por wow chim kabu leh yeiwon iwon ki laad yarap wa yoh naka sorkar.
U Bari Leslie Kharmalki General Secretary MSNP+ da batai pynche u hajrong ka kjut HIV, kamjooh ki rukom sumaar wa e ki thaw sumaar.
Da ong u wa kamwa tip, ka jylla Meghalaya toh kawa roi bha ini i jait kjut tangwa kattæ leh dang boon ki wym em chimkhia u phah Test yaki hi, kamtæ kyntu u wow ya wan chakhmat neibhah man iwa emkaam wow tip yei man i long yong i de.
Ka Iada Wriah, Deputy Director Care Support Treatment napoh ka MACS, da batai ko yaki thaw e dawai HIV næ ki ART Centre wa em ha Shillong, heijooh i por ong ko wa neini chakhmat da ye kiwa kjut u lai cha ki Civil hospital wa jan neibhah ki ART Centre ha man ki Civil Hospital leh e dawai ki wei sdang ki u krehkaam nadooh ka 01-11-19.
Da khana ko leh wa kani ka kjut kat dang lai ki sngi nang ku nang ku ko wei man i maa wa khroo yaka imlang sahlang lada ym man kiwa syndong. Da ong wa hapoh u Naikhynde (September) 2019 da yoh yukheiñ wa em 4458 ngut hapoh ka jylla kiwa man HIV Positive namo kiwa da tikna wa em ya u khniang HIV kiwa da pyntikna ha ki ATR Centre wei na kini em leh kiwa ym bien u wa wan chah sumaar. Wei kiwa boon duh toh ha ki le tylli ki District ka jylla wa kynthup yaka East Jaiñtia kawa em 1045 ngut, ha East Khasi 1557 katwa ha West Jaiñtia 1233 ngut.
Yaka yalang da pynlai da u Deputy Commissioner WJHD u Garod LNS Dykes, da yoh ki kyntien pdiang naka R. Patlong Field Mentor FHI 360, wei neilang ki sahep sorkar ki chnat waphær waphær da batai ki yaki jait Scheme wa em neibynta u e yarap ya ki paidbah.
Discussion about this post