Hadooh 45 ngut ki bru da chah kem ki ha ki pulit ka Assam heiyatoh wa i lait tooh ki thup kylli namo ki Question Paper ha ka yaleh kreh Sub-Inspector Unarmed Branch, SI (UB), neibynta ki 597 tylli ki kaam wa lait. Kiwa chah kem kynthup ki ya uwi uwa yahkhmat ka BJP uwa da dep chah beh u Diban Deka wa u Ex-DIG u Prasanta Kumar Dutta kiwa da chah kem ki heiyatoh wa ini.
Ki pulit da lai khynra ki leh ya ki yung kiwa chah pynbaad wei da yoh kem ki yaka poisa wa T. 5 klur.
U Assam DGP u Bhaskar Jyoti Mahanta da pyntip u wa ki pulit da kem ki la 45 ngut ki bru heiyatoh wa i lait tooh wei da e 5 tylli ki Case, da yoh leh wow kem yaki kot ki sla kamjooh kiwi ki sabut.
Yaka Assam Police SI (UB) Written Exam da pyndam yaka haka September 20, 2020, hadien wa ki Question Paper da saam ki bru ki ha WhatsApp. U Assam Chief Minister u Sarbananda Sonowal hadien ini da phah u yaki pulit wow pynman yaka takit wa bniah wei ym toh u pynlait ya kiwon kiwon kiwa emkti ha kani ka kaam.
“I u kreh chitom i yow chem tre ya kiwa emkti ha kani ka kaam wa kiyi kiwa pynlait tooh ya kini ki Question Paper wei suki suki da sdang wow chem dien ya i rukom poor ini i lait tooh wei ym slem daw ye u kem ya uwa pynlait tooh nyngkong”, da pyntip u Assam DGP Bhaskar Jyoti Mahanta.
“Dang pynman yaka takit yow chem tre yaka poisa wa yoh kem. Wei ym pynlait i ya kiwon kiwon kiwa emkti ha ini i kaam pynlait tooh yaki thup kylli Exam,” da ong u ADGP (L&O) GP Singh.
