Ka Meghalaya Board of School Education (MBOSE), ynne ka sngi da pynbna ko yaka Result ka Secondary School Leaving Certificate (SSLC) Examination, 2020 heiwa na waroh kiwa yaleh ya kani ka Exam kiwa em 50081 ngut kiwa lait da em ki 25195 ngut iwa man 50.31% iwa hiar naka 55.72% ynnin u snem, wei uni u snem man leh wa duna dooh kiwa lait ha kini ki 4 snem wa da dep.
Lada kheiñ won du ki Regular Candidate, kiwa lait da em ki 75% heiwa 76.39% toh ki chynrang wa 73.93% ki kynthai.
Kiwa yaleh kam ki Private With Test kiwa lait da em ki 41.29% katwa ki Private Without Test da em ki 25.29% kiwa lait.
Na ki District won, kiwa boon dooh wa yaleh ya kani ka Exam toh na East Khasi Hills kiwa em 13186 ngut katwa kiwa duna dooh toh na South West Khasi Hills kiwa em 1838 ngut.
Ka District wa boon dooh kiwa lait na kiwa yaleh toh ka West Jaiñtia Hills kawa da yoh 69.96% heiwa kiwa yaleh da em ki 3925 ngut katwa kiwa lait da em ki 2746 ngut. Wa ar da yoh ka East Jaiñtia Hills kawa yoh 69.00% kawa em 1903 ngut kiwa yaleh wei kiwa lait da em ki 1313 ngut.
Ka District wa duna dooh kiwa lait toh ka South Garo Hills kiwa em 26.57% heiwa da yaleh 2834 ngut katwa kiwa lait da em ki 753 ngut.
Na ri-loom Jaiñtia ki skur kiwa da yoh 100% ka Pass Percentage toh ka Ches’ Star Secondary School, Jowai; K.B. Memorial Secondary School, Wapung; Lummuroo Secondary School, Shangpung; Marian Hill Higher Secondary School, Jowai; Mynso Secondary School, Mynso; Narpuh Modern Secondary School, Umkiang; Nephington Laloo M Secondary School, Wahiajer, Church of God Secondary School, Ummulong wa ka Sacred Heart Secondary School, Byndihati.
Haka thup yong kiwa leh bha dooh ki 20 ngut namo ka First Twenty Candidate Merit List, da yoh nyngkong ka Chetna Bose (E,M,S&T,SSc,HPE,H) kawa na Sherwood School, Tura.
Ka St. Anthony’s Higher Secondary School kawa da khur ya kiwa boon ki kyrdan haka HSSLC, haka SSLC da mih pyrtuid du uwi u khynnah yong ka na ki 20 ngut.
