U Montri khynnah ka sorkar pyrdi wa pait ya ka ka Food Processing Industries, u Rameswar Teli da embynta lang u ha Christian Girls Higher Secondary School, Tura, ynne ka sngi hei emlang u Chief Executive Member, Garo Hills Autonomous District Council (GHADC), u Benedic R Marak, u Chairman, GHADC, u Rakesh Sangma, deilang wa kiwa chah khut sñiawbha deiwa emlang ki bru wa seiñ khih da i yong ki hi, ha ka yalang wa pynman da ka GHADC.
U Rameswar Teli hawa e yei klam da khanna u ya ki Scheme wa e da ka Ministry of Food Processing Industries ka sorkar India wei da pyntip u leh ya ki laad yarap neibynta ki warep wa kiwa seiñ khih kiwa kyrpang ya ka thaaiñ North East.
Hawa klam chaphang ki soh wa kiwi ki mar rep kam u syiñ, u chirmit, u murit wa kiwi kiwi kiwa da rep khlem dawai, da ong u wa ki karkhana chna baam (Food Processing Industries) ye wow seiñ ya ki deiwa yaleh da ki Scheme na ka Ministry of Food Processing Industries, ka sorkar India. Chooh chooh da pyntip u wa ka Ministry yarap ko 50% ka bai kit cha ki warep wa chalan ya ki mar yong ki kam cha Mumbai, Delhi wa kiwi kiwi.
Da ong u leh wa ka jylla Meghalaya em ko chiboon ki laad ki kabu wow sdang ya ki karkhana pynmih baam ki wow man leh kam ki laad yoh khih ki bru. Da pyntip u leh wa hapoh ka PMKSY Scheme, da dep wai u ya ka Mega Food Park ha Ri-Bhoi District.
U CEM ka GHADC, u Benedic R Marak da ong u wa ini toh i sien wa nyngkong wa u Montri da wan u chapoh ka District heiwa da pynchlur u ya oo wow lai pait hadooh katwon miat ki mar hapoh ka thaaiñ wa ki kaam wa da sdang da ka District Council yow pynchlur ya ki kaam chna baam.
U CEM da e u leh ya ka dorkhat cha u Rameswar Teli. Heiwa neiliang u Montri leh da yaklam u wa kiwa da dep seiñ dei yong ki hi i khih wei da lai pait u leh ya i pynyoo rong ya ki mar rep wa da rep khlem da pynemkaam sboh dawai wa kynthup ya i umngap, ki mombati, ki Wine wa chna na ki soh wa mih hapoh ka thaaiñ, ki ladaw, ki sachram wa ki Chips wa da chna hi.
