50% ki wow chah jied hapoh ka Meghalaya District Research Fellowship toh kiwa na baar jylla, pyrchah ka KSU

Ka Khasi Students’ Union lyngba ka Employment Monitoring Cell da phah dorkhat ko cha u Sampath Kumar, uwa man kam u Development Commissioner yong ka chnat Planning, Investment, Promotion & Sustainable Development Department (PIPSDD) ka sorkar Meghalaya.

Kani ka chnat da e kti ko cha ka Indian School of Business (ISB) kawa pynlai ya ka Bharti Institute of Public Policy wow thung ya 28 ngut hapoh ka jylla kam chibynta ka Meghalaya District Research Fellowship (MDRF) ki wow man kam ki wow yarap ya ki Magistrate wa ki Deputy Commissioner.

Ka seiñ da chem ko wa da Advertise ya ini i kreh ha LinkedIn kawa man du kam ka rynsan Social Media tangwa ym em pynlait paidbah lyngba ki Website yong ki chnat sorkar næ ha ki kot khubor. Wei ini i leh da wanrah yei thung kreh sop sop khlem da pyntip ya ki khynroo thooh kreh yong ka jylla. Chooh chooh, ym em pyntip bniah hajrong i rukom wow chah jied næ kiwon kiwa ye u yaleh ya ini i kreh.

Da chem leh wa kani ka ISB da booh kyndon ko wa 50% na kini ki kreh daw lai cha ki bru kiwa na baar jylla i wym ye ka seiñ u pdiang wei toh u pyndam noh ya kani ka kyndon.

Related posts

Hanla u pynman ya ka National Games ha Meghalaya daw hap e bhah leh ya kiwi ki jylla ka NE

May 17, 2025

Da kyrriah ya kiwa yaleh CUET (UG) cha ki Centre wa em ha Shillong iwa jngai dooh ha Guwahati

May 17, 2025

Ka seiñ da ong ko wym ye u sñiawthooh ileh wa hap thung ya kini ki yow yarap ya ki Magistrate wa ki Deputy Commissioner kiwa da man kam ki MCS/IAS, ileh ki DC ymtoh kiwa biang mo wow pynlai ya kiwon kiwon ki Scheme næ wow pait ya iwon iwon i kaam hadooh wa emkaam thung kreh da kiwi wow yarap ya ki.

Ka seiñ da chem ko leh yeiwa roi kini ki Consultancy Agency ha Secretariat ha man ki chnat sorkar. Wei da kylli leh iyi myntoi ki paidbah wa em kam kini ki Agency, iyi leh won kiwa kreh sorkar hadooh wa da hap khut da kini lym toh wow pynsepai hi-eh ya ka poisa ki paidbah wei wow thung kreh da ki khon ki heh ki haaiñ wei du ki kattu katni donhi kiwa yoh hok yeini i kreh deiwa biang i stat.

Kamtæ ka seiñ da ong ko wa lada emkaam wow leh kiwon kiwon ki Research næ kiwon kiwon kiwa hap wow pynlum pynlang yukheiñ, ka sorkar toh u e ko cha ka NEHU næ kiwi ki University yong ka jylla khnang wa ki khynroo khyllood ka jylla u yoh kaam yoh jaam ki wei daw man ko leh wow ku i stat i tip ki baar yow yoh myntoi kiwa na baar.

Khaddooh ka seiñ da dawa ko wa waroh kini ki 28 tylli ki kreh toh u pyndap bait da ki tre jylla wei lada ym leh kamtæ, ka seiñ ym e laad ko wow lai chakhmat.

Neyliang u Sampath Kumar, da kular u wow chimkhia yeini wa da dawa ka seiñ.