Hadien wa ka sorkar da pynbna ko wa da chah biang u pynemkaam yei sboh dawai namo ki Fertiliser ha ki thaw wa da jied hapoh ka jylla nadooh ka 9 tarik uni u bnai wei i thmu leh toh wow pynyoh hei dor wa biang, heijooh i por leh wow chdooh kti ya ki warep yow ye hi ki wow kylla noh chei rep wa tip kam ka Organic Farming namo ka rep khlem da pynemkaam dei sboh dawai wa chna u bru.
Kamtæ ka sorkar da jied ko ya ka Meghalaya State Cooperative Marketing & Consumers’ Federation Limited (MECOFED) kawa em hapoh ka Cooperation Department kawa du ka kawa ye wow wanrah yei bhah sboh ka jylla wa wan na ka Indian Farmers Fertiliser Cooperative Limited (IFFCO) Guwahati yow lai e won cha ki warep.
Ka sorkar da ong ko leh wa i dor sboh wa dai ha ki yaaw ki haat toh kiwa syad iwa da ktah bha ya ki warep hapoh ka jylla wei da sñiaw yeiwa emkaam u e i kyrchaan ya ki warep yow yarap pynku ya ka nong ki.
Hajrong ini da chim ya ka rai wa ki warep wa toh u yoh ya ini i sboh sorkar daw dai cha ki hei dor wa duna da 50% na i dor yaw.
